मुंबई, 6 नोव्हेंबर, (हिं.स.) - पाथरी शहरात ऐन निवडणुकीच्या पार्श्वभूमीवर मोठा राजकीय भूचाल बसला असून पाथरी येथील अनेक मान्यवरांनी उपमुख्यमंत्री तथा राष्ट्रवादी काँग्रेस पक्षाचे राष्ट्रीय अध्यक्ष अजित पवार यांच्या नेतृत्वावर विश्वास ठेवत मुंबई येथे राष्ट्रवादी काँग्रेस पक्षात जाहीर प्रवेश केला. मुंबई येथे झालेल्या या प्रवेश सोहळ्यात उपमुख्यमंत्री अजितदादा पवार, प्रदेशाध्यक्ष खा. सुनील तटकरे, आमदार राजेश विटेकर, आ. शिवाजीराव गर्जे, लतीफभाई तांबोळी तसेच संजय कुलकर्णी आदी मान्यवरांच्या उपस्थितीत हा कार्यक्रम पार पडला.

या प्रवेशामध्ये पाथरी येथील माजी नगराध्यक्ष मोईजभाई अन्सारी, काँग्रेसचे पदाधिकारी अनिस फारुकी, सईद अन्सारी (माजी नगरसेवक, शिवसेना), शाखेर सिद्दिकी (माजी नगरसेवक, शिवसेना), डॉ. तौफिक शेख (काँग्रेस), अ. मजीद अन्सारी (काँग्रेस), रहीम अन्सारी (काँग्रेस), वली पाशा कुरेशी (माजी नगरसेवक, शिवसेना), वाजेद बेग (काँग्रेस), कृष्णा गिराम (शिवसेना), चंद्रकांत हारकळ (शिवसेना), विठ्ठल थोरात (भाजपा), आरिफ एजाज कादरी (काँग्रेस), तज्जमुळ फारोखी (काँग्रेस), शायान फारुख फारुखी (काँग्रेस), शहानवाज फारोखी (भाजपा), एजाज सिद्दिकी (शिवसेना), सय्यद सद्दाम (काँग्रेस), अतीम फुळवरे (शिवसेना), नाना तुपस मिंद्रे (काँग्रेस), अरुण वाकडे (काँग्रेस), चंद्रसिंग नाईक (काँग्रेस), आकाश क्षीरसागर (भाजपा), सागर कदम, जमीर पटेल, शेख अशफाक, नाजीम कुरेशी, कालु कुरेशी व बिट्टू कुरेशी यांचा समावेश आहे.

या सर्व प्रवेशकर्त्यांचे अजित पवार यांनी पक्षात स्वागत करताना सांगितले की, “राष्ट्रवादी काँग्रेस पक्ष हा सर्वसामान्य जनतेच्या विकासासाठी आणि प्रगतीसाठी कार्यरत असलेला पक्ष आहे. एकजुटीने व जनतेच्या विश्वासाने काम करा. स्थानिक स्वराज्य संस्थांच्या निवडणुका तोंडावर आहेत. गावोगावी जाऊन जनतेचा कौल जाणून घ्या, शासकीय योजनांची माहिती द्या आणि सकारात्मक संवाद साधा. पाथरी नगर परिषदेत राष्ट्रवादी काँग्रेसचा झेंडा तुम्ही नक्की फडकवाल, असा मला पूर्ण विश्वास आहे.” या कार्यक्रमाला राष्ट्रवादी काँग्रेसचे वरिष्ठ पदाधिकारी, कार्यकर्ते व मोठ्या संख्येने समर्थक उपस्थित होते.

---------------

हिंदुस्थान समाचार / Chaitanya JayantRao Chitnis