कॅनबेरा, 14 डिसेंबर, (हिं.स.)।सिडनीतील बॉन्डी बीचवर दोन सशस्त्र व्यक्तींनी सामूहिक गोळीबार केला. गोळीबाराची माहिती मिळताच पोलिसांनी तातडीने कारवाई सुरू केली. अहवालानुसार, या गोळीबारात एकूण दहा जणांचा मृत्यू झाला आहे.

माहितीनुसार, यहूदी सण हनुक्का साजरा करण्यासाठी शेकडो लोक बॉन्डी बीचवर जमले होते. याच वेळी हल्लेखोरांनी अंदाधुंद गोळीबार सुरू केला. अनेक राऊंड गोळ्या झाडल्यानंतर बीचवर उपस्थित असलेल्या लोकांमध्ये प्रचंड गोंधळ उडाला.

सोशल मीडियावर व्हायरल झालेल्या व्हिडिओंमध्ये बॉन्डी बीचवर लोक घाबरून पळताना दिसत असून, पार्श्वभूमीवर गोळ्यांचे आवाज आणि पोलिसांचे सायरन ऐकू येत आहेत.

अहवालानुसार, त्यांच्या पत्रकारांनी पाहिलेल्या व्हिडिओंमध्ये काळ्या कपड्यांतील दोन व्यक्ती बीचजवळील एका पुलाजवळ गोळीबार करताना दिसत आहेत. सुमारे डझनभर गोळ्यांचे आवाज ऐकू आले आणि लोक किंचाळत इकडे-तिकडे पळू लागले.

न्यू साउथ वेल्स पोलिसांनी सोशल मीडिया प्लॅटफॉर्म ‘एक्स’वरील ताज्या पोस्टमध्ये बॉन्डी बीच परिसरातून दोन जणांना ताब्यात घेतल्याची माहिती दिली आहे. मात्र पोलिसांची मोहीम अद्याप सुरू असून, नागरिकांना या परिसरापासून दूर राहण्याचे सातत्याने आवाहन करण्यात येत आहे. पोलिसांनी सर्व सूचनांचे पालन करण्याचे निर्देश दिले असून, पोलिसांनी उभारलेल्या कोणत्याही नाकाबंदीचा भंग करू नये, असा इशाराही दिला आहे.

पोलिसांनी हेही स्पष्ट केले आहे की डोवर हाइट्स भागात कोणत्याही प्रकारच्या घटनेची माहिती नाही. नागरिकांनी अफवा पसरवू नयेत, असे आवाहन पोलिसांकडून करण्यात आले असून, या प्रकरणातील पुढील माहिती याच ठिकाणी दिली जाईल.

---------------

हिंदुस्थान समाचार / Priyanka Bansode