रत्नागिरी, 15 डिसेंबर, (हिं. स.) : येथील महर्षी कर्वे स्त्री शिक्षण संस्थेच्या बाया कर्वे व्होकेशनल ट्रेनिंग इन्स्टिट्यूटतर्फे बाया कर्वे यांच्या पुण्यतिथीनिमित्त आयोजित पेंट युवर पॅशन स्पर्धेचे बक्षीस वितरण थाटात झाले.

पटवर्धन हायस्कूलच्या कीर सभागृहामध्ये हा कार्यक्रम झाला. रत्नागिरी जिल्ह्यातील ८ शाळांमधून 155 विद्यार्थी या स्पर्धेमध्ये सहभागी झाले होते. सहभागी विद्यार्थ्यांना स्पर्धेसाठी भविष्यातील रत्नागिरी, पर्यावरणपूरक घर, माझ्या घरातील आवडता कोपरा असे विषय देण्यात आले होते. विद्यार्थ्यांनी चित्रे काढून आपली सर्जनशीलता प्रभावीपणे मांडली. सहभागी शाळांमधून कला शिक्षक, विद्यार्थी तसेच पालक उपस्थित होते.

कार्यक्रमाच्या अध्यक्षस्थानी महर्षी कर्वे स्त्री शिक्षण संस्थेचे प्रकल्प प्रमुख मंदार सावंतदेसाई उपस्थित होते. प्रमुख पाहुणे म्हणून डॉ. स्वप्नजा मोहिते आणि आर्किटेक्ट मकरंद केसरकर यांनी उपस्थित राहून बक्षीसपात्र पहिल्या तीन तसेच उत्तेजनार्थ क्रमाकांना रोख रक्कम, ढाल, प्रशस्तीपत्रक देऊन गौरविण्यात आले. प्रत्येकी सहभागी शाळांनाही पदक आणि प्रशस्तीपत्रक देऊन कौतुक करण्यात आले.

डॉ. स्वप्नजा मोहिते यांनी कला आणि व्यक्तिमत्त्व विकास याविषयी आपले विचार मांडले. मकरंद केसरकर यांनी कला आणि कलेमधून करिअरच्या कोणत्या संधी उपलब्ध होऊ शकतात, याविषयी माहिती सांगितली. पाहुण्यांनी विद्यार्थ्यांच्या चित्रांमधील कल्पकता, रंगसंगती आणि संदेशवहनाचे कौतुक केले.

---------------

हिंदुस्थान समाचार / रत्नागिरी