अमरावती, 19 डिसेंबर (हिं.स.)। वाळकी रोडस्थित बोरनदी प्रकल्पाच्या प्रवेशद्वारासमोर शुक्रवारी दुपारी सुमारे ३:३० वाजताच्या सुमारास चार हल्लेखोरांनी मिळून धारदार शस्त्राने सपासप वार करत एका युवकाची निर्घृण हत्या केली.या घटनेमुळे संपूर्ण परिसरात भीतीचे वातावरण पसरले आहे.हत्या झालेल्या युवकाचे नाव मन्या उर्फ मंथन रवींद्र पाळनकर (१७) रा.शिलांगण रोड, सातूरणा अमरावती असे आहे.मन्या उर्फ मंथन हा काही महिन्यांपूर्वी अमरावतीत झालेल्या यश रोडगे हत्याकांडातील आरोपी असल्याचे समजते.

आठ दिवसांपूर्वी गुन्हे शाखेने मंथन ला एका प्रकरणात अटक केली होती त्यांनतर तो जमानत वर बाहेर आला होता.शुक्रवारी सकाळी घटनेतील एका आरोपीने मंथन ला मॅसेज करून वाळकी रोड वर बोलावले होते.मंथन साडे तीन वाजताच्या दरम्यान विना नंबरप्लेटच्या स्पोर्ट बाईक ने बोरनदी प्रकल्पाच्या मुख्य प्रवेशद्वारावर पोहचला आणि काही समजण्याच्या आतच चार जणांनी घेरून त्याच्या मानेवर,हातावर आणि पोटावर चाकूने वार केले. मंथन रक्ताच्या थारोळ्यात घटनास्थळी पडलेला असतांना रस्त्याने जाणाऱ्या नागरिकांनी घटनेची माहिती नांदगाव पेठ पोलिसांना दिली.

घटनेची माहिती मिळताच नांदगाव पेठ पोलीस स्टेशनचे पोलीस निरीक्षक दिनेश दहातोंडे यांच्यासह पोलीस पथक तात्काळ घटनास्थळी दाखल झाले.फॉरेन्सिक टीम देखील घटनास्थळी पोहचली होती. परिसराची नाकाबंदी करून पंचनामा सुरू करण्यात आला. तसेच गुन्हे शाखेचे पोलीस निरीक्षक संदीप चव्हाण, कैलास फुंडकर यांच्यासह वरिष्ठ पोलीस अधिकारी घटनास्थळी उपस्थित होते.

प्राथमिक माहितीनुसार, मृतक मंथन पाळनकर हा काही दिवसांपूर्वी घडलेल्या यश रोडगे हत्याकांडातील आरोपी असल्याचे समोर आले आहे. याच पार्श्वभूमीवर यश रोडगेच्या हत्येचा बदला घेण्याच्या उद्देशानेच मंथनची हत्या करण्यात आल्याची जोरदार चर्चा परिसरात सुरू होती.

दिवसाढवळ्या झालेल्या या हत्येमुळे कायदा-सुव्यवस्थेचा प्रश्न पुन्हा एकदा ऐरणीवर आला असून नागरिकांमध्ये संतापाची भावना व्यक्त होत आहे. पोलीस प्रशासनाने हल्लेखोरांचा शोध घेण्यासाठी विशेष पथके रवाना केली असून सीसीटीव्ही फुटेज, तांत्रिक माहिती व प्रत्यक्षदर्शींच्या आधारे तपास वेगात सुरू आहे.या थरारक घटनेने नांदगाव पेठ परिसर हादरून गेला असून पुढील तपासातून आणखी धक्कादायक माहिती समोर येण्याची शक्यता वर्तवली जात आहे.

आरोपींच्या दिशेने पथक रवाना

मन्या उर्फ मंथन पाळनकर याच्या हत्येची माहिती मिळताच पोलीस तात्काळ घटनास्थळी दाखल झाले. घटनास्थळी पंचनामा करून पुढील तपास सुरू करण्यात आला. मंथन ज्या वाहनाने घटनास्थळी आला होता त्या वाहनाच्या आधारे मालकाची माहिती घेऊन तपासाची चक्रे वेगाने फिरवण्यात आली आहेत.तसेच हत्या करणाऱ्या आरोपींचा माग काढण्यासाठी विशेष पथक तयार करून त्यांच्या संभाव्य दिशेने रवाना करण्यात आले आहे. पोलिसांकडून तांत्रिक व गोपनीय माहितीच्या आधारे तपास सुरू असून लवकरच या हत्याप्रकरणातील आरोपींना अटक करण्यात येईल.

दिनेश दहातोंडेवरिष्ठ पोलीस निरीक्षक,पो.स्टे. नांदगाव पेठ

---------------

हिंदुस्थान समाचार / अरुण जोशी