पुणे, 21 डिसेंबर (हिं.स.)।

सावित्रीबाई फुले पुणे विद्यापीठाच्या आवारात स्वच्छ, सुंदर व पर्यावरणपूरक परिसर निर्माण करण्याच्या उद्देशाने सर्वसमावेशक स्वच्छता अभियान उत्साहात राबविण्यात आले. मा. कुलगुरू प्रा. डॉ. सुरेश गोसावी यांच्या मार्गदर्शनाखाली आणि प्र - कुलगुरू प्रा. डॉ. पराग काळकर यांच्या उपस्थितीत हे अभियान रविवार, दि. २१ डिसेंबर २०२५ रोजी सकाळी ९ वाजता पार पडले.

या अभियानाअंतर्गत विद्यापीठातील शैक्षणिक व प्रशासकीय इमारती, रस्ते, बागा तसेच सार्वजनिक जागांची स्वच्छता करण्यात आली. प्रभारी कुलसचिव प्रा. (डॉ.) ज्योती भाकरे यांनी प्रशासनाच्या वतीने विद्यापीठातील शिक्षक, शिक्षकेतर कर्मचारी व विद्यार्थ्यांना या अभियानात सक्रिय सहभाग घेण्याचे आवाहन केले होते.

या आवाहनाला सकारात्मक प्रतिसाद देत विद्यापीठातील शिक्षक, शिक्षकेतर कर्मचारी व विद्यार्थी यांनी मोठ्या संख्येने सहभाग नोंदविला. स्वच्छतेबरोबरच पर्यावरण जतन व सामाजिक जबाबदारीचे भान निर्माण करण्याच्या दृष्टीने हे अभियान महत्त्वपूर्ण ठरले.

स्वच्छ परिसर हीच सुदृढ शैक्षणिक वातावरणाची पहिली पायरी असल्याचे मत उपस्थितांनी व्यक्त केले. या उपक्रमामुळे विद्यापीठ परिसर अधिक स्वच्छ, नीटनेटका व आकर्षक झाल्याचे चित्र दिसून आले

---------------

हिंदुस्थान समाचार / भूषण राजगुरु