जळगाव , 31 डिसेंबर (हिं.स.) शहरातील गजबजलेल्या व प्रतिष्ठित गोलाणी मार्केट परिसरात बुधवारी दुपारी सुमारे दोन वाजेच्या सुमारास जुन्या वादातून एका तरुणावर चाकूने हल्ला करून त्याचा खून करण्याचा प्रयत्न करण्यात आला. मात्र, घटनास्थळी उपस्थित असलेल्या एका पोलिस कर्मचाऱ्याने प्रसंगावधान राखत धाव घेऊन हल्लेखोराला ताब्यात घेतल्याने मोठी अनर्थ टळला असून जखमी तरुणाचे प्राण वाचले आहेत. सध्या त्याच्यावर खाजगी रुग्णालयात उपचार सुरू आहेत. साई गणेश बोराडे (वय १८, रा. शंकरराव नगर, जळगाव) असे जखमी तरुणाचे नाव असून तो देवकर महाविद्यालयात डिप्लोमा शिक्षण घेत आहे. तो कुटुंबासह शंकरराव नगर परिसरात वास्तव्यास आहे.

दरम्यान, संशयित आरोपी शुभम रवींद्र सोनवणे (वय २५, रा. चौगुले प्लॉट, जळगाव) याच्याशी साई बोराडे याचा मागील काही काळापासून वाद सुरू होता. बुधवारी सकाळीही किरकोळ कारणावरून दोघांमध्ये शाब्दिक वाद झाल्याची माहिती आहे. दुपारी साई बोराडे हा कामानिमित्त गोलाणी मार्केट परिसरात आला असताना, तेथे आलेल्या शुभम सोनवणे याने अचानक चाकू काढून साईच्या उजव्या बाजूस वार केला. त्यानंतर त्याने डाव्या बाजूसही चाकूने घाव घालून त्याला गंभीर जखमी केले. या घटनेने मार्केट परिसरात एकच खळबळ उडाली. याचवेळी मोबाईलच्या कामानिमित्त गोलाणी मार्केटमध्ये आलेले एमआयडीसी पोलीस स्टेशनमध्ये कार्यरत असलेले पोलीस हवालदार रमेश बाबुलाल चौधरी यांनी प्रसंगावधान राखत घटनास्थळी धाव घेतली. त्यांनी हल्लेखोर शुभम सोनवणे याला पकडून पुढील वार होण्यापासून साई बोराडे याला वाचवले. तत्काळ संशयित आरोपीला शहर पोलीस स्टेशनच्या ताब्यात देण्यात आले. जखमी साई बोराडे याला नागरिकांच्या मदतीने प्रथम शासकीय वैद्यकीय महाविद्यालय व रुग्णालयात दाखल करण्यात आले.

प्राथमिक उपचारानंतर त्याला पुढील उपचारासाठी खाजगी रुग्णालयात हलवण्यात आले आहे. त्याची प्रकृती सध्या स्थिर असल्याचे सांगण्यात येत आहे. घटनेची माहिती मिळताच शहर पोलीस स्टेशनचे निरीक्षक सागर शिंपी यांच्यासह पोलीस कर्मचारी घटनास्थळी दाखल झाले. त्यांनी परिसराची पाहणी केली तसेच रुग्णालयात जाऊन जखमी तरुणाची विचारपूस केली. साई बोराडे यांच्या फिर्यादीवरून संशयित आरोपीविरुद्ध शहर पोलीस स्टेशनला गुन्हा दाखल करण्याची प्रक्रिया सुरू आहे.

---------------

हिंदुस्थान समाचार / मनोहर कांडेकर