जळगाव , 11 मार्च (हिं.स.) जळगाव तालुक्यातील नशिराबाद गावजवळील जळगाव खुर्द गावाच्या पुलाजवळ रात्री तीन परप्रांतीय तरुण लोखंडी पट्टीवर झोपलेले असताना अज्ञात वाहनाने तिघांना एकाच वेळी चिरडल्याची धक्कादायक बाब मंगळवारी ११ मार्च रोजी सकाळी उघडकीला आली आहे. सिकंदर नाटूसिंग राजपूत, भुपींदर मिथीलाल राजपूत आणि योगेश कुमार राजबहाद्दूर तिघे रा. उत्तर प्रदेश अशी मृतांची नावे असून त्यांची ओळख पटली आहे . या घटनेची माहिती मिळाल्यानंतर नशिराबाद पोलीस ठाण्याचे पोलीस कर्मचारी यांनी घटनास्थळी धाव घेतली. पंचनामा करून तिघांचे मृतदेह जिल्हा शासकीय वैद्यकीय महाविद्यालयात दाखल करण्यात आले आहे.

जळगाव खुर्द गावाजवळ रेल्वे उड्डाणपुलाच्या बाजूला रस्त्याचे काम सुरू आहे. येथे काम करणारे परप्रांतीय मजूर रात्री लोखंडी पट्टीवर झोपले होते. अंधारामुळे वाहनचालकाला ते दिसले नसल्याने, अज्ञात वाहनाने तिघांना जागेवरच चिरडले. मंगळवारी सकाळी ७ वाजता हा प्रकार समोर आला. पोलिसांनी घटनेची नोंद करून अज्ञात वाहनाचा शोध सुरू केला आहे. या घटनेने परिसरात हळहळ व्यक्त केली जात आहे.

हिंदुस्थान समाचार / मनोहर कांडेकर