अकोला, 30 ऑगस्ट (हिं.स.)।

अकोला शहरा जवळ असलेल्या खडकी परिसरातील शहापुरे यांच्या शेतात तब्बल 12 फुटांचा अजगर आढळून आल्याने परिसरात मोठी खळबळ उडाली. सध्या शेतीचे काम सुरू असताना अचानक शेतात अजगर दिसल्याने शेतकरी व शेतमजुरांमध्ये भीतीचे वातावरण निर्माण झाले.

घटनेची माहिती मिळताच ग्रामस्थांनी तातडीने स्थानिक सर्पमित्र अजित देशमुख यांना पाचारण केले. त्यांच्यासह प्रवीण हुंडीवाले, सतीश गवळी, प्रवीण गवळी, राजेश गवळी, अतुल लंगोटे व अन्य ग्रामस्थांनी धाडसाने शर्थीचे प्रयत्न करत अजगराला सुरक्षितपणे पकडले.

यानंतर वन्यजीव संरक्षण नियमांचे पालन करत या अजगराला निसर्गाच्या सानिध्यात जंगलात सोडून देण्यात आले. योग्य वेळेत खबरदारी घेतल्यामुळे कोणतीही जीवितहानी किंवा इजा झाली नाही. त्यामुळे ग्रामस्थांनी सुटकेचा निश्वास सोडला आहे.

गावातील ज्येष्ठ नागरिकांनी सांगितले की, सर्पमित्र व ग्रामस्थांनी योग्य वेळी मदत केली नसती, तर मोठा अनर्थ ओढवू शकला असता. यानंतर ग्रामस्थांनी संबंधित सर्पमित्रांचे आभार मानले.

---------------

हिंदुस्थान समाचार / जयेश गावंडे