न्यूयॉर्क, 31 ऑगस्ट (हिं.स.) भारताचा युकी भांब्री आणि त्याचा न्यूझीलंडचा जोडीदार मायकेल व्हीनस यांनी अमेरिकन जोडी मार्कोस गिरॉन आणि लर्नर टिएन यांना पराभूत करून अमेरिकन ओपन टेनिस स्पर्धेच्या पुढील फेरीत प्रवेश केला. पण रोहन बोपण्णा आणि अर्जुन कढे त्यांच्या जोडीदारांसह पराभूत झाल्यानंतर बाहेर पडले. जगातील नंबर वन टेनिसपटू यानिक सिनरने पहिला सेट गमावल्यानंतर शानदार पुनरागमन करून अमेरिकन ओपन टेनिस स्पर्धेत आपली विजयी मोहीम सुरू ठेवली. महिला एकेरीमध्ये कोको गॉफ आणि नाओमी ओसाका यांनी विजयासह अमेरिकन ओपन टेनिस स्पर्धेच्या महिला एकेरीच्या चौथ्या फेरीत प्रवेश केला. आता त्या एकमेकांशी पुढच्या फेरीत भिडणार आहेत.

भांब्री आणि व्हीनस या १४ व्या मानांकित जोडीने शानदार खेळ केला. आणि ६-०, ६-३ असा विजय मिळवला. त्यांनी त्यांच्या प्रतिस्पर्ध्याला पुनरागमन करण्याची संधी दिली नाही आणि सामन्यात फक्त तीन गेम गमावले. भांब्री आणि व्हीनस यांनी पहिल्या सेटमध्ये एकही गेम गमावला नाही. आणि दुसऱ्या सेटमध्येही त्यांची लय कायम ठेवली. त्यांनी त्यांच्या प्रतिस्पर्ध्यांची सर्व्हिस लवकर मोडली आणि सामना सहज जिंकला.

भारताचा स्टार टेनिसपटू रोहन बोपण्णा आणि त्याचा मोनॅकोचा जोडीदार रोमेन अर्नेडो यांना रॉबर्ट कॅश आणि जेम्स ट्रेसी या अमेरिकन जोडीकडून फक्त एक तास आणि पाच मिनिटांत ४-६, ३-६ असा पराभव स्वीकारावा लागला. कॅश आणि ट्रेसीने उत्कृष्ट खेळ केला आणि ब्रेक पॉइंट्सचा प्रभावीपणे फायदा घेतला. दरम्यान, यूएस ओपनमध्ये पदार्पण करणाऱ्या कढे आणि त्याचा जोडीदार डिएगो हिडाल्गो हे दुसऱ्या मानांकित मॅट पॅव्हिक आणि मार्सेलो अरेव्हालो यांच्याविरुद्ध होते. कढे आणि हिडाल्गो यांनी पहिला सेट जिंकून दुसऱ्या मानांकित जोडीला थोडा त्रास दिला, परंतु अखेर ७-५, ६-७(४), ४-६ असा पराभव सहन लागला.

गतविजेत्या सिनरने जागतिक क्रमवारीत २७ व्या क्रमांकावर असलेल्या डेनिस शापोवालोव्हचा ५-७, ६-४, ६-३, ६-३ असा पराभव करून चौथ्या फेरीत प्रवेश केला. सामन्यानंतर सिनर म्हणाला, 'मी मशीन नाही आणि तुम्हाला सर्वांना हे माहित आहे. मलाही कधीकधी संघर्ष करावा लागतो. माझ्यावरही दबाव असणे स्वाभाविक आहे. तुम्हाला सामन्यानुसार जुळवून घ्यावे लागेल.' इटालियन खेळाडूने हार्डकोर्टवर अशा प्रकारे आपली चमकदार कामगिरी सुरू ठेवली. क्वार्टर फायनलमध्ये पोहोचण्यासाठी, त्याला अमेरिकेच्या १४ व्या क्रमांकाच्या टॉमी पॉल किंवा कझाकस्तानच्या २३ व्या क्रमांकाच्या अलेक्झांडर बुब्लिकशी सामना करावा लागेल. या विजयासह सिनेरने हार्डकोर्टवर झालेल्या ग्रँडस्लॅम स्पर्धेत आपली अपराजित मोहीम २४ सामन्यांपर्यंत वाढवली आहे. यामध्ये २०२४ मध्ये अमेरिकन ओपन आणि २०२४ आणि २०२५ मध्ये ऑस्ट्रेलियन ओपनचे विजेतेपदांचा समावेशआहे. जुलैमध्ये त्याने विम्बल्डनमध्ये ग्रास कोर्टवर ट्रॉफी देखील उंचावली होती.

ओसाका आणि गॉफ पुढील फेरीत एकमेकांसमोर येतील. माजी चॅम्पियन यापूर्वी २०१९ मध्ये अमेरिकन ओपनमध्ये एकमेकांसमोर आले होते. त्यावेळी ओसाका गतविजेती होती आणि तिने १५ वर्षीय गॉफला सरळ सेटमध्ये हरवले. या पराभवानंतर गॉफ तिचे अश्रू रोखू शकली नाही आणि ओसाकाने तिचे सांत्वन केले. ओसाका शनिवारी म्हणाली, 'मी तिला लहान बहिणीसारखी मानते, म्हणून तिच्यासोबत पुन्हा येथे खेळणे चांगले आहे.'

---------------

हिंदुस्थान समाचार / वृषाली देशपांडे