रत्नागिरी, 2 सप्टेंबर, (हिं. स.) : कै. सीताराम नारायण देशपांडे यांच्या १२५व्या जयंती महोत्सवानिमित्त कृतज्ञता मंच, दुर्गेवाडी (ता. चिपळूण) आणि रत्नागिरी जिल्हा क्रीडा व शारीरिक शिक्षण शिक्षक महासंघ यांच्या संकल्पनेतून दिला जाणारा जिल्हास्तरीय ‘क्रीडारत्न पुरस्कार २०२५’ परशुराम एज्युकेशन सोसायटीच्या युनायटेड इंग्लिश स्कूलचे क्रीडाशिक्षक समीर चंद्रकांत कालेकर यांना जाहीर झाला आहे.
या पुरस्कारासाठी जिल्हाभरातून २६ क्रीडा शिक्षकांनी कार्याचा अहवाल समितीकडे सादर केला होता. त्यामधून क्रीडा क्षेत्रातील उल्लेखनीय योगदानाबद्दल श्री. कालेकर यांची निवड करण्यात आली.हा पुरस्कार शुक्रवारी नाचणे येथे कृतज्ञता मंचाचे अध्यक्ष शांताराम देशपांडे, ॲड. प्रसाद देशपांडे (मुंबई हायकोर्ट), जिल्हा क्रीडा अधिकारी विजय शिंदे, श्री. राहुल टोपले (अध्यक्ष मिशन ऑरगॅनिक अॅग्रिकल्चर, चंदगड), तसेच रत्नागिरी जिल्हा क्रीडा व शारीरिक शिक्षण शिक्षक महासंघाचे अध्यक्ष उदयराज कळंबे, सचिव राजेश जाधव यांच्या हस्ते प्रदान करण्यात येणार आहे.
श्री. कालेकर एक उत्कृष्ट क्रीडाशिक्षक असून कबड्डीचे नामांकित राष्ट्रीय पंच आहेत. त्यांच्या मार्गदर्शनाखाली युनायटेड इंग्लिश स्कूलमधील अनेक खेळाडूंनी राज्य, राष्ट्रीय व आंतरराष्ट्रीय स्तरावर यश संपादन केले आहे. सध्या ते चिपळूण तालुका क्रीडा समन्वयक म्हणून जिल्हा क्रीडा कार्यालयात कार्यरत आहेत.या पुरस्कारामध्ये रोख पाच हजार, सन्मानचिन्ह, सन्मानपत्र, शाल व श्रीफळ यांचा समावेश आहे.
---------------
हिंदुस्थान समाचार / रत्नागिरी
