काठमांडू, १२ सप्टेंबर (हिं.स.) - नेपाळमधील राजकीय संघर्षादरम्यान सुरू असलेल्या तरुणांच्या निदर्शनांमध्ये आतापर्यंत ५१ जणांचा मृत्यू झाला आहे, ज्यात तीन पोलिस अधिकारी आणि एका भारतीय महिलेचा समावेश आहे.
आरोग्य आणि लोकसंख्या मंत्रालयाने शुक्रवारी सांगितले की, काठमांडू खोरे आणि इतर जिल्ह्यांमध्ये हे मृत्यू झाले आहेत. निदर्शनाच्या पहिल्या दिवशी २१ जणांचा पोलिसांच्या गोळीने मृत्यू झाला. यामध्ये तुरुंगातून पळून गेलेले नऊ कैदी देखील होते. मंत्रालयाच्या म्हणण्यानुसार, निदर्शनांमध्ये १,७७१ निदर्शक जखमी झाले आहेत, त्यापैकी २८४ जणांना उपचारानंतर घरी पाठवण्यात आले आहे. आतापर्यंत मृतांची संख्या ५१ झाली आहे, ज्यात तीन पोलिस, ९ कैदी आणि एक अनोळखी भारतीय महिला यांचा समावेश आहे. यापैकी पाच जणांचा मृत्यू बालसुधारगृहात झालेल्या संघर्षात झाला आहे.
नेपाळ पोलिसांचे प्रवक्ते विनोद घिमिरे म्हणाले की, त्रिभुवन विद्यापीठ शिक्षण रुग्णालयात मृतांचे शवविच्छेदन करण्याची प्रक्रिया सुरू करण्यात आली आहे. रुग्णालयाच्या फॉरेन्सिक विभागाने पुष्टी केली की आतापर्यंत एकूण ३६ मृतदेह मिळाले आहेत. यापैकी एक मृतदेह ओळखता येत नाही. सध्या, नऊ मृतदेहांचे शवविच्छेदन केले जात आहे. मृतांचे नातेवाईक जिल्हा पोलिस कार्यालयातून पत्रे आणल्यावरच या मृतदेहांचे शवविच्छेदन केले जात आहे.
---------------
हिंदुस्थान समाचार / सुधांशू जोशी
