बीजिंग, 13 सप्टेंबर (हिं.स.)ऑलिंपियन आणि सध्याची मिश्र संघ पिस्तूल विश्वविजेती ईशा सिंगने आंतरराष्ट्रीय शूटिंग स्पोर्ट्स फेडरेशन (ISSF) विश्वचषकात अचूक वेध साधला आहे. महिलांच्या १० मीटर एअर पिस्तूल स्पर्धेत तिने सुवर्णपदक पटकावले आहे. ज्यामुळे भारताला स्पर्धेतील पहिले पदक मिळाले आहे. निंगबो ऑलिंपिक स्पोर्ट्स सेंटर येथे झालेल्या अंतिम सामन्यात ईशाने यजमान चीनच्या आवडत्या आणि फॉर्ममध्ये असलेल्या याओ चियानसुनचा फक्त ०.१ गुणांनी पराभव केला. या स्पर्धेतील सध्याची ऑलिंपिक विजेती कोरियाची ओ येजिनला कांस्यपदकावर समाधान मानावे लागले.

विश्वचषक एअर पिस्तूल स्पर्धेत पहिल्यांदाच सुवर्णपदक जिंकल्यानंतर ईशा म्हणाली, मी खूप आनंदी आहे कारण एअर पिस्तूल ही तीच स्पर्धा आहे जिथून मी नेमबाजीला सुरूवात केली होती. यामध्ये विश्वचषक सुवर्णपदक जिंकणे ही माझ्यासाठी एक मोठी कामगिरी आहे. माझे काही ध्येय साध्य होताना पाहून बरे वाटते. पुढील आव्हानांबद्दल ती म्हणाली, या वर्षीचे पुढचे मोठे ध्येय म्हणजे जागतिक अजिंक्यपद स्पर्धा. आम्ही त्यासाठी कठोर परिश्रम करत आहोत आणि मला खात्री आहे की कैरोमध्ये भारतीय संघाची कामगिरी निश्चितच सुधारेल.

पुरुषांच्या २५ मीटर रॅपिड फायर पिस्तूलमध्ये, भावेश शेखावतने ५७५ गुणांसह २२ वे स्थान पटकावले. त्याचा देशबांधव प्रदीप सिंग शेखावतही त्याच गुणांसह २३ वे स्थान पटकावले, तर मनदीप सिंग ५६२ गुणांसह ३९ वे स्थान पटकावले.

ईशाच्या सुवर्णपदकासह, भारत आता पदकतालिकेत पाचव्या स्थानावर पोहोचला आहे आणि निंगबोमध्ये सुवर्णपदक जिंकणाऱ्या पाच देशांमध्ये सामील झाला आहे. यजमान चीन दोन सुवर्ण, चार रौप्य आणि एक कांस्यपदकांसह अव्वल स्थानावर आहे. भारताने या विश्वचषकात चौथ्या ते सहाव्या क्रमांकाच्या नेमबाजांना संधी दिल्या आहेत.

---------------

हिंदुस्थान समाचार / वृषाली देशपांडे