रत्नागिरी, 15 सप्टेंबर, (हिं. स.) : क्रीडा व युवक सेवा संचालनालय, जिल्हा क्रीडा परिषद व जिल्हा क्रीडा कार्यालयामार्फे जिल्हा फूटबॉल संघटनेच्या तांत्रिक सहकार्याने डेरवण (ता. चिपळूण) येथील एसव्हीजेसीटी क्रीडा संकुलात झालेल्या स्पर्धेत चिपळूणला विजेतेपद मिळाले.

या जिल्हास्तरीय शालेय फुटबॉल स्पर्धेचे आयोजन करण्यात आले होते. या स्पर्धेमध्ये १४, १७ व १९ वर्षे वयोगटातील मुले व मुलींमध्ये एकूण २७ संघांमधील ४८६ खेळाडू सहभागी झाले होते. यावेळी प्रमुख पाहुणे दिनेश पुजारी, एसव्हीजेसीटी क्रीडा संकुलचे क्रीडा संचालक श्रीकांत पराडकर, जिल्हा फूटबॉल संघटनेचे अध्यक्ष प्रसाद परांजपे, क्रीडा शिक्षक अजित दवडे, कुणाल चव्हाण, समीर यादव, आशीष कानापडे आदी उपस्थित होते.

१४ वर्षांखालील मुलांच्या वयोगटात चिपळूणच्या एस. पी. एम इंग्लिश मिडियम स्कूलच्या संघाने खेडच्या रोटरी इंग्लिश मिडीयम स्कूलसंघाचा पराभव करून विजेतेपद पटकावले. रत्नागिरीचा सेंट थॉमस संघ तिसऱ्या स्थानावर राहिला. १४ वर्षांखालील मुलींमध्ये सेंट थॉमस संघाने संगमेश्वरच्या कै. सौ. मीनाताई ठाकरे माध्यमिक विद्यालय संघाविरुद्ध अंतिम सामना जिंकला. चिपळूणच्या एस. पी. एम इंग्लिश मिडियम स्कूल संघाने तृतीय क्रमांक पटकाविला.

१७ वर्षांखालील मुलांच्या वयोगटामध्ये एस. पी. एम इंग्लिश मिडियम स्कूल आणि रोटरी इंग्लिश मीडियम स्कूल यांच्यामधील अंतिम सामन्यात एस. पी. एम इंग्लिश मीडियम स्कूल संघाने अंतिम विजेतेपद मिळविले. सेंट थॉमस संघाने तृतीय क्रमांक पटकाविला. १७ वर्षांखालील मुलींच्या गटात एसव्हीजेसीटी इंग्लिश मीडियम स्कूल संघाने रत्नागिरीच्या सॅक्रेड हार्ट कॉन्व्हेंट संघाविरुद्ध विजेतेपद पटकाविले. संगमेश्वरच्या पी. एस. बने इंटरनॅशनल संघाने तृतीय क्रमांक मिळविला.

१९ वर्षांखालील मुलांच्या अंतिम सामन्यात रत्नागिरीतील अभ्यंकर कुलकर्णी कनिष्ठ महाविद्यालय आणि चिपळूणच्या डी. बी. जे महाविद्यालय संघात झालेल्या सामन्यामध्ये रत्नागिरी या संघाने विजेतेपद पटकावले. खेडच्या कै. प्र. ग. कांबळे ज्ञानदीप विद्यामंदिर संघाने तृतीय क्रमांक पटकाविला. १९ वर्षांखालील मुलींच्या गटात झालेल्या चुरशीच्या अंतिम सामन्यामध्ये अभ्यंकर कुलकर्णी कनिष्ठ महाविद्यालय संघाने सुवर्ण कामगिरी करीत विजेतेपद मिळविले. उपविजेतेपद खेडच्या ज्ञानदीप इंग्लिश मीडियम स्कूल संघाने मिळवले. तृतीय स्थान सावर्डे येथील गोविंदराव निकम माध्यमिक व उच्च माध्य विद्यालय संघाने पटकाविले.

---------------

हिंदुस्थान समाचार / रत्नागिरी