नाशिक, 3 सप्टेंबर (हिं.स.)
- नाशकात थेट पोर्टेबल सोनोग्राफी मशिनद्वारे गर्भलिंग निदानच्या रॅकेटचा पर्दाफाश करण्यात आला आहे. या घटनेमुळे शहरात खळबळ उडाली असून, चाळीसगाव तालुक्यातील संशयित डॉक्टर इनोव्हा कारमधून गर्भलिंग निदानचे रॅकेट चालवत असल्याचा संशय आहे. इंदिरानगर पोलिसांनी इनोव्हा कार व सोनोग्राफी मशिनसह ताब्यात घेतले होते. दरम्यान, या प्रकरणाबाबत महापालिकेच्या आरोग्य विभागाने कमालीची गुप्तता पाळल्याचे चित्र आहे. कारण सदर प्रकार दीड-दोन महिन्यापूर्वीचा आहे. परंतु, प्रकरणाचे गांभीर्य लक्षात घेता महापालिकेच्या आरोग्य विभागाने संशयित डॉक्टरवर गर्भलिंग निदान प्रतिबंधक कायदा (पीसीपीएनडीटी) अन्वये जिल्हा न्यायालयात खटला दाखला केला आहे.
इंदिरानगर येथील सिग्नलजवळ डॉ. बाळकृष्ण नारायण पाटील (रा. देवळी, ता. चाळीसगाव, जि. जळगाव) असे संशयिताचे नाव असून, त्याच्याविरोधात गर्भलिंगनिदान प्रकरणी खटला दाखल करण्यात आला आहे. इंदिरानगर पोलिसांनी इनोव्हा कार व पोर्टेबल सोनोग्राफी मशिन ताब्यात घेतल्यानंतर सदर परिसर महापालिकेच्या हद्दीत येत असल्याने याबाबतची माहिती पोलिसांनी नाशिक महापालिकेच्या आरोग्य विभागाला देताच, वैद्यकीय अधीक्षक डॉ. विजयकुमार देवकर, सहा. आरोग्य अधिकारी डॉ. जितेंद्र धनेश्वर यांच्यासह पथकाने घटनास्थळी जाऊन पाहणी केली. दरम्यान, पोर्टेबल सोनोग्राफी मशिन आहे. ते छोटे असल्याने कुठेही घेऊन जाणे शक्य आहे. संशयित पाटीलची पीसीपीएनडीटी गर्भलिंगनिदानच्या सल्लागार समितीकडून चौकशी करण्यात आली. तत्पूर्वी त्या चौकशीसाठी पाटील यांनी हजर राहावे यासाठी महापालिकेच्या वैद्यकीय विभागाने त्यास नोटीस बजावली होती. दरम्यान, चौकशीत समाधानकारक उत्तर न मिळाल्याने डॉ. बाळकृष्ण पाटील यांच्याविरोधात आयुक्त मनीषा खत्री, अतिरिक्त आयुक्त करिष्मा नायर यांच्या निर्णयानुसार अॅड. सुवर्णा शेफाळे यांच्या माध्यमातून जिल्हा न्यायालयात खटला दाखल करण्यात आला आहे.
इंदिरानगर येथे दीड-दोन महिन्यापूर्वी डॉ. बाळकृष्ण पाटील यांना इनोव्हा कारमध्ये पोलिसांनी पोर्टेबल सोनोग्राफी मशिन जप्त केले होते. त्यानंतर संबंधिताविरोधात गर्भलिंगनिदान कायद्यान्वये न्यायालयात खटला दाखल करण्यात आला आहे. गर्भलिंगनिदान कायद्याने गुन्हा असून, कायद्याचे उल्लंघन करणाऱ्यांवर कारवाई केली जाईल.
-डॉ. विजयकुमार देवकर, वैद्यकीय अधीक्षक, मनपा.
---------------
हिंदुस्थान समाचार / GOSAVI CHANDRASHEKHAR SUKDEV
