रायगड, 14 जानेवारी (हिं.स.)। पनवेल महानगरपालिका सार्वत्रिक निवडणूक २०२५–२६ च्या पार्श्वभूमीवर मतदारांमध्ये मतदानाबाबत जनजागृती निर्माण करण्यासाठी विविध उपक्रम राबविण्यात येत आहेत. त्याचाच एक भाग म्हणून निवडणूक अधिकारी मंगेश चितळे यांच्या मार्गदर्शनाखाली कामोठे येथे भव्य ५ किलोमीटर मॅरेथॉनचे आयोजन करण्यात आले. या मॅरेथॉनला शालेय व महाविद्यालयीन विद्यार्थ्यांचा उत्स्फूर्त प्रतिसाद लाभला.

के. एल. ई. कॉलेज कळंबोली, सरस्वती कॉलेज ऑफ इंजिनिअरिंग तसेच लोकनेते रामशेठ ठाकूर ज्युनिअर कॉलेज, कामोठे येथील सुमारे ३०० विद्यार्थ्यांनी या मॅरेथॉनमध्ये सहभाग नोंदवला. “माझे मत, माझा अधिकार – लोकशाही मजबूत करूया” अशा घोषणांसह मतदानाची प्रतिज्ञा घेत मॅरेथॉनची सुरुवात झाली. विद्यार्थ्यांच्या धावण्याबरोबरच मतदानाचे महत्त्व पटवून देणारे संदेश नागरिकांपर्यंत पोहोचले.यावेळी उपायुक्त डॉ. वैभव विधाते, जनसंपर्क अधिकारी नितीन साके, आरोग्य विभाग प्रमुख अनिल कोकरे तसेच विविध महाविद्यालयांचे शिक्षक उपस्थित होते. याच अनुषंगाने पिल्लई महाविद्यालयातही मतदान जनजागृतीसाठी वॉकेथॉनचे आयोजन करण्यात आले.

प्रथम मतदारांना प्रत्यक्ष धडे

सीकेटी महाविद्यालयात स्वीप कार्यक्रमांतर्गत अभिरूप मतदान केंद्राचा अभिनव उपक्रम राबविण्यात आला. उमेदवारी अर्ज भरण्यापासून मतमोजणी व निकाल घोषणेपर्यंतची संपूर्ण प्रक्रिया प्रात्यक्षिक स्वरूपात सादर करण्यात आली. या उपक्रमामुळे प्रथम मतदारांमध्ये निवडणूक प्रक्रियेबाबत उत्साह आणि जागरूकता वाढताना दिसत आहे.

---------------

हिंदुस्थान समाचार / संदेश साळुंके