कोलकाता, 14 जानेवारी (हिं.स.)कोलकाता उच्च न्यायालयाने बुधवारी आयपीएसी छापा प्रकरणी तृणमूल काँग्रेस (टीएमसी) ची याचिका फेटाळून लावली. पक्षाने आरोप केला होता की, तपास यंत्रणेने (ईडी) ८ जानेवारी रोजी आयपीएसीचे आयटी प्रमुख प्रतीक जैन यांच्या कार्यालयावर छापा टाकला होता आणि काही कागदपत्रे जप्त केली होती.

तपास यंत्रणेचे प्रतिनिधित्व करणारे एएसजी राजू यांनी रेकॉर्डवर सांगितले की, एजन्सीने पक्ष कार्यालयातून काहीही जप्त केलेले नाही. न्यायालयाने निकाल देताना म्हटले की, ईडीने काहीही जप्त केलेले नसल्याचे म्हटले असल्याने, आता खटल्याची सुनावणी करण्याची आवश्यकता नाही. याचिका फेटाळण्यात येत आहे. सुनावणीदरम्यान, ईडीचे प्रतिनिधित्व करणारे एएसजी राजू यांनी सांगितले की जर कोणतेही रेकॉर्ड जप्त केले गेले असतील तर त्या फाईल्स एजन्सीने नव्हे तर ममता बॅनर्जी यांनी बेकायदेशीरपणे सोबत नेल्या होत्या. उच्च न्यायालयाने ईडीने दाखल केलेल्या याचिकेवरील सुनावणी तहकूब केली. न्यायालयाने नमूद केले की, या प्रकरणावरील याचिका सुप्रीम कोर्टात आधीच दाखल करण्यात आली आहे आणि सुप्रीम कोर्टाच्या निर्णयानंतर त्यावर सुनावणी करण्यात येईल. ८ जानेवारी रोजी अंमलबजावणी संचालनालयाने (ईडी) कथित कोळसा घोटाळ्याशी संबंधित मनी लाँड्रिंग प्रकरणाच्या संदर्भात आय-पीएसीच्या साल्ट लेक कार्यालयावर आणि त्यांचे संचालक प्रतीक जैन यांच्या निवासस्थानी छापा टाकला. अधिकाऱ्यांच्या इशाऱ्यांना न जुमानता मुख्यमंत्री ममता बॅनर्जी यांनी पोलिसांच्या मदतीने जैन यांच्या निवासस्थानी जबरदस्तीने प्रवेश केला आणि महत्त्वाचे डिजिटल पुरावे आणि कागदपत्रे हिसकावून घेतली, असा आरोप एजन्सीने केला आहे. ईडीच्या मते, यामुळे शोध मोहीम अयशस्वी झाली आणि कोणतीही जप्ती करण्यात आली नाही.

------------------

हिंदुस्थान समाचार / वृषाली देशपांडे