मुंबई, 17 जानेवारी (हिं.स.)। ओपनएआयने आपले नवीन एआय-शक्तीचे टूल ‘चॅटजीपीटी ट्रान्सलेट’ लाँच केले आहे. या टूलमुळे वापरकर्ते कोणतेही लॉग-इन न करता आणि कोणतेही सबस्क्रिप्शन शुल्क न भरता 50 पेक्षा जास्त भाषांमध्ये सहज भाषांतर करू शकणार आहेत. गुगल ट्रान्सलेटला थेट टक्कर देण्यासाठी तयार करण्यात आलेल्या या नव्या प्लॅटफॉर्मचा इंटरफेस दिसायला गुगल ट्रान्सलेटसारखाच असून वापरासाठी अतिशय सोपा आहे.

खरेतर, चॅटजीपीटीमध्ये भाषांतराची सुविधा आधीपासूनच होती, मात्र आता कंपनीने यासाठी स्वतंत्र वेब प्लॅटफॉर्म तयार केला आहे. वापरकर्ते थेट chatgpt.com/translate या संकेतस्थळावर जाऊन हे टूल वापरू शकतात. यासाठी लॉग-इनची गरज नाही. फक्त मूळ भाषा आणि ज्या भाषेत भाषांतर हवे आहे ती निवडायची, आणि लगेच अचूक अनुवाद मिळतो.

या टूलची सर्वात मोठी खासियत म्हणजे ते केवळ शब्दांचे भाषांतर करत नाही, तर वाक्यामागील भाव, संदर्भ आणि म्हणींचा अर्थही समजून घेते. त्यामुळे भाषांतर अधिक नैसर्गिक, अचूक आणि अर्थपूर्ण होते. ओपनएआयचा दावा आहे की हे टूल हिंदी, इंग्रजी, मराठी, जपानी, अरबीसह 50 पेक्षा अधिक भाषांना समर्थन देते आणि संपूर्ण वाक्याचा योग्य अर्थ समजून भाषांतर करते.

यामध्ये वापरकर्त्यांसाठी सानुकूलनाचेही खास पर्याय देण्यात आले आहेत. जर भाषांतर खूप पुस्तकी वाटत असेल, तर ते अधिक बोलचालच्या भाषेत बदलता येते. व्यावसायिक ईमेल किंवा औपचारिक मजकुरासाठी भाषा अधिक प्रोफेशनल करता येते, तर कठीण मजकूर मुलांना समजेल इतका सोपा करूनही दाखवता येतो. याशिवाय, हॉटेलच्या मेन्यू कार्डचा किंवा रस्त्यावरील फलकाचा फोटो अपलोड केल्यास त्याचा अर्थ समजावून सांगण्यासोबत व्याकरण दुरुस्त करण्यातही हे टूल मदत करते.

तथापि, या नव्या प्लॅटफॉर्ममध्ये अजूनही काही मर्यादा आहेत. सध्या इमेज इनपुट, PDF अपलोड आणि रिअल-टाइम व्हॉइस इनपुटसारख्या सुविधा उपलब्ध नाहीत, ज्या गुगल ट्रान्सलेटमध्ये अनेक वर्षांपासून आहेत. गुगलने अलीकडेच ‘जेमिनी’ एआयच्या मदतीने ‘लाइव्ह स्पीच-टू-स्पीच’ फीचर सादर केले असून, त्याद्वारे हेडफोनच्या माध्यमातून रिअल-टाइममध्ये संभाषणाचे भाषांतर करता येते आणि बोलणाऱ्याची लय व टोनही कायम ठेवता येतो.

भाषा शिकणाऱ्यांसाठी हे टूल विशेष उपयुक्त ठरणार आहे. केवळ भाषांतरच नव्हे, तर वापरकर्ते फॉलो-अप प्रश्न विचारू शकतात. उदाहरणार्थ, एखाद्या शब्दाचा अर्थ, वापर किंवा संदर्भ समजला नसेल, तर त्याबाबत अधिक माहिती लगेच मिळू शकते. दुसरीकडे, गुगलनेही आपल्या ॲपमध्ये ‘कस्टमाइज्ड प्रॅक्टिस सेशन’ आणि ‘स्ट्रीक ट्रॅकर’सारखी वैशिष्ट्ये जोडून वापरकर्त्यांना भाषा शिकण्यासाठी प्रेरित ठेवण्याचा प्रयत्न केला आहे.

---------------

हिंदुस्थान समाचार / Suraj Chaugule