लातूर, 19 जानेवारी (हिं.स.)।

लातूर जिल्हा परिषद व पंचायत समिती सार्वत्रिक निवडणूक २०२६ चा रणसंग्राम सुरू झाला असून, प्रशासकीय यंत्रणा पूर्णपणे सज्ज झाली आहे. निवडणूक निर्णय अधिकारी श्रीमती रोहिणी नऱ्हे-विरोळे यांनी नुकतीच नोडल अधिकाऱ्यांची आढावा बैठक घेऊन निवडणूक प्रक्रिया पारदर्शक आणि शांततेत पार पाडण्याचे निर्देश दिले आहेत.

​

नामनिर्देशन पत्रांची लगबग

​निवडणूक वेळापत्रकानुसार, नामनिर्देशन पत्रे स्वीकारण्याची अंतिम मुदत २१ जानेवारी २०२६ (दुपारी ३ वाजेपर्यंत) आहे. आतापर्यंत १३२ इच्छुकांनी १८३ अर्जांची खरेदी केली असून, अर्ज दाखल करण्यासाठी केवळ दोन दिवसांचा अवधी शिल्लक आहे. उमेदवारांच्या सोयीसाठी तहसील कार्यालयात १० विशेष तपासणी पथके आणि एक सुसज्ज मदत कक्ष कार्यान्वित करण्यात आला आहे.

​आचारसंहिता आणि भरारी पथके तैनात

​निवडणूक काळात नियमांचे उल्लंघन होऊ नये, यासाठी लातूर तालुक्यात कडक पावले उचलण्यात आली आहेत:

​एक खिडकी योजना: वाहन आणि बॅनर परवानग्यांसाठी पंचायत समितीमध्ये स्वतंत्र कक्ष (प्रमुख: प्रमोद राठोड).

​भरारी पथके: गट विकास अधिकारी श्याम गोडभरले यांच्या नेतृत्वाखाली विशेष पथके कार्यरत.

​चेक पोस्ट: पेठ, ममदापूर, मुरुड आणि महापूर येथे स्थिर देखरेख पथके तैनात.

​महत्त्वाच्या तारखा विसरू नका!

अर्ज भरण्याची शेवटची तारीख २१ जानेवारी २०२६ स. ११ ते दु. ३

अर्जांची छाननी २२ जानेवारी २०२६ सकाळी ११ पासून

अर्ज माघारी घेण्याची मुदत २३ ते २७ जानेवारी २०२६

टीप: २५ व २६ जानेवारी रोजी सार्वजनिक सुट्टीमुळे माघार प्रक्रिया बंद राहील.)

​आवाहन: उमेदवारांनी शेवटच्या क्षणाची घाई टाळून वेळेत अर्ज सादर करावेत आणि आदर्श आचारसंहितेचे काटेकोर पालन करून प्रशासनास सहकार्य करावे.-रोहिणी नऱ्हे-विरोळे (निवडणूक निर्णय अधिकारी, लातूर)

​या बैठकीस सहायक निवडणूक निर्णय अधिकारी सौदागर तांदळे, बी.डी.ओ. श्याम गोडभरले, नायब तहसीलदार गणेश सरोदे, सुधीर देशमुख व इतर अधिकारी उपस्थित होते.

---------------

हिंदुस्थान समाचार / Mahesh Madanrao Chitnis