परभणी, 02 जानेवारी (हिं.स.)। महानगरपालिका सार्वजनिक निवडणुकीच्या पार्श्‍वभूमीवर आज शुक्रवार 2 जानेवारी रोजी भरारी पथकांची महत्त्वपूर्ण बैठक जिल्हाधिकारी कार्यालयात पार पडली. यावेळी निवडणूक प्रक्रियेच्या अनुषंगाने भरारी पथकांना सविस्तर सूचना व मार्गदर्शन केले. या बैठकीस निवडणूक अधिकारी तथा आयुक्त नितीन नार्वेकर, निवासी उपजिल्हाधिकारी अनुराधा ढालकरी, नगरपालिका प्रशासन विभाग प्रमुख महेश गायकवाड, तहसीलदार संदीप राजापुरे, मुख्यालयाचे परीक्षक श्रीरंग भुतडा आणि कोषागार अधिकारी दत्ता भांगे उपस्थित होते.

या बैठकीत निवडणूक अधिकारी तथा आयुक्त नितीन नार्वेकर आणि उपजिल्हाधिकारी अनुराधा ढालकरी यांनी भरारी पथकांना सविस्तर सूचना व मार्गदर्शन केले. प्रत्येक भरारी पथकाने आपल्या कार्यक्षेत्रातील पाच उपपथकांच्या माध्यमातून सभा, रॅली तसेच वाहन वापरासाठी आवश्यक परवानग्या घेतल्या आहेत की नाही, याची काटेकोर पाहणी करावी, असे निर्देश देण्यात आले. तसेच उमेदवारांच्या सभा, रॅली, प्रचार घोषणाबाजी, वर्तमानपत्रातील बातम्या तसेच मीडिया व प्रसारमाध्यमांमधील जाहिरातींची रोजच्या रोज तपासणी करण्याचे आदेश देण्यात आले. निवडणुकीदरम्यान पैसा, दारू अथवा अन्य प्रलोभनांचे वाटप केल्याचे आढळल्यास तत्काळ पंचनामा करून कठोर कारवाई करण्यात यावी, असे स्पष्ट करण्यात आले. सभा व रॅलीसाठी आवश्यक सर्व परवाने ‘एक खिडकी योजना’ प्रणालीद्वारे घेतले आहेत की नाही, याची माहिती भरारी पथकांनी घ्यावी. तसेच एसीसी पथकाच्या माध्यमातून प्रचार बंद झाल्यानंतर 72 तास सतर्क राहून नियंत्रण ठेवण्याचे निर्देश देण्यात आले. ज्या ठिकाणी सभा होईल, त्या ठिकाणी भरारी पथकाने प्रत्यक्ष जाऊन व्हिडिओ चित्रीकरण करून ते भरारी पथकाच्या प्रमुखाकडे सादर करावे, असेही सांगण्यात आले. आचारसंहितेचा भंग करणार्‍यांवर तात्काळ कारवाई करण्यात यावी. तसेच निवडणूक उमेदवारांच्या खर्चाचा अहवाल लेखा अधिकार्‍यांकडे वेळेत सादर करावा. निवडणूक खर्चाची मर्यादा 9 लाख रुपयांपर्यंत असल्याची माहितीही यावेळी देण्यात आली. ---------------

हिंदुस्थान समाचार / Chaitanya JayantRao Chitnis