मंत्री भरत गोगावले यांच्या हस्ते ध्वजारोहण; गुणवंतांचा सत्कार
रायगड, 26 जानेवारी (हिं.स.) : भारतीय प्रजासत्ताक दिनानिमित्त रायगड जिल्ह्यातील पोलीस कवायत मैदानावर मुख्य शासकीय कार्यक्रम उत्साहात आणि शिस्तबद्ध वातावरणात पार पडला. या कार्यक्रमात मंत्री भरत गोगावले यांच्या हस्ते राष्ट्रध्वजारोहण करण्यात आले व राष्ट्रध्वजाला मानवंदना देण्यात आली.
या वेळी आमदार महेंद्र दळवी, जिल्हाधिकारी किशन जावळे, जिल्हा पोलीस अधीक्षक आँचल दलाल, मुख्य कार्यकारी अधिकारी नेहा भोसले, अपर जिल्हाधिकारी सुनील थोरवे, निवासी उपजिल्हाधिकारी संदेश शिर्के यांच्यासह विविध विभागांचे अधिकारी, कर्मचारी व मोठ्या संख्येने नागरिक उपस्थित होते.
कार्यक्रमादरम्यान पोलीस दल, गृहरक्षक दल, वाहतूक विभाग, जलद प्रतिसाद पथक, अग्निशमन दल तसेच विविध शाळांच्या विद्यार्थ्यांनी आकर्षक संचलन व प्रात्यक्षिके सादर केली. या सादरीकरणांनी उपस्थितांची मने जिंकली.
यावेळी मंत्री भरत गोगावले यांनी आपल्या भाषणात भारतीय संविधानाचे महत्त्व अधोरेखित करत स्वातंत्र्यसैनिक व क्रांतीकारकांच्या बलिदानाचे स्मरण केले आणि सर्व नागरिकांना प्रजासत्ताक दिनाच्या शुभेच्छा दिल्या.
कार्यक्रमात गुणवंत शासकीय कर्मचाऱ्यांचा सत्कार करण्यात आला. तसेच उत्कृष्ट खेळाडू, शाळा आणि सामाजिक कार्यकर्त्यांचा गौरव करून त्यांच्या कार्याची दखल घेण्यात आली. कार्यक्रमाच्या शेवटी उपस्थितांनी राष्ट्रीय एकात्मता, सामाजिक सलोखा जपण्याची व जिल्ह्याच्या सर्वांगीण विकासासाठी योगदान देण्याची प्रतिज्ञा घेतली.
या सोहळ्यामुळे नागरिकांमध्ये देशभक्तीची भावना अधिक दृढ झाली असून, प्रजासत्ताक दिनाचा उत्सव औचित्यपूर्ण आणि प्रेरणादायी ठरला.
-----------------
हिंदुस्थान समाचार / संदेश साळुंके
