तेहरान, 08 जानेवारी (हिं.स.)।इराणमध्ये आर्थिक संकटामुळे परिस्थिती दिवसेंदिवस अधिकच बिकट होत चालली आहे. दरम्यान, सोशल मीडियावर एक व्हिडिओ मोठ्या प्रमाणावर व्हायरल होत असून, त्यामध्ये दक्षिण-पूर्वेकडील सिस्तान आणि बलुचिस्तान प्रांतात अज्ञात हल्लेखोरांनी ड्राइव्ह-बाय शूटिंगद्वारे एका पोलिस कर्मचाऱ्याची हत्या केल्याचे दिसून येते.

या व्हायरल व्हिडिओमध्ये एक अज्ञात हल्लेखोर पोलिसांच्या वाहनावर सतत गोळीबार करताना दिसतो. अखेर पोलिसांची गाडी रस्त्यावरून घसरून अपघातग्रस्त होते. हा व्हिडिओ हल्लेखोराच्या वाहनातून चित्रीत करण्यात आला असून, तो खिडकीतून बाहेर झुकलेला दिसतो आणि फक्त बंदुकीचा नळ दिसत असताना तो पोलिसांच्या वाहनावर सलग गोळ्या झाडतो.इराणी माध्यमांच्या माहितीनुसार, मृत पोलिस कर्मचाऱ्याची ओळख इराण शहरमधील सुरक्षा दलाचा सदस्य महमूद हकीकत अशी झाली आहे.यापूर्वी बुधवारी इराण शहर काउंटीतील कायदा अंमलबजावणी दलातील एका कर्मचाऱ्यावरही अज्ञात व्यक्तींनी गोळीबार केला होता, ज्यामध्ये त्याचा मृत्यू झाला होता.

अहवालांनुसार, जातीय बलुच अल्पसंख्याकांच्या हक्कांसाठी लढत असल्याचा दावा करणाऱ्या जैश-अल-अदल या दहशतवादी संघटनेने या हल्ल्याची जबाबदारी स्वीकारल्याचे म्हटले जाते. या सुन्नी दहशतवादी संघटनेने अलीकडेच इराणच्या धार्मिक सत्तास्थानांना लक्ष्य करण्यासाठी अनेक लहान बलुच अर्धसैनिक गटांसोबत एक नवे गठबंधन स्थापन केले आहे.राजधानी तेहरानजवळ सुरू असलेल्या अस्थिरतेदरम्यान चाकूबाजीच्या घटनेत आणखी एका इराणी पोलिस कर्मचाऱ्याचा मृत्यू झाला आहे. आर्थिक संकटाविरोधातील आंदोलनांचा आज 12 वा दिवस आहे. वृत्तसंस्थेनुसार, तेहरानच्या पश्चिमेकडील मलार्ड काउंटीमध्ये कायदा-सुव्यवस्था राखण्याच्या प्रयत्नात पोलिस दलाचे सदस्य शाहिन देहगान यांच्यावर चाकूहल्ला करण्यात आला, ज्यात त्यांचा मृत्यू झाला.

ही अस्थिरता गेल्या महिन्यात तेहरानच्या शतकानुशतके जुन्या ग्रँड बाजारात सुरू झाली होती, जिथे दुकानदारांनी रियालच्या तीव्र घसरणीविरोधात दुकाने बंद ठेवली होती. त्यानंतर ढासळलेली आर्थिक स्थिती, पाश्चात्त्य निर्बंध, सरकारी गैरव्यवस्थापन तसेच राजकीय व सामाजिक स्वातंत्र्यावर असलेल्या बंधनांविरोधातील जनतेचा रोष संपूर्ण देशभर उसळला.इराणमधून समोर आलेल्या अनेक व्हिडिओंमध्ये निदर्शक सर्वोच्च नेते आयातुल्ला अली खामेनेई यांच्या नेतृत्वाखालील इस्लामी सरकारविरोधात मोर्चे काढताना दिसत आहेत. ‘जोपर्यंत मुल्लांना पुरले जात नाही, तोपर्यंत हा देश मुक्त होणार नाही’ आणि ‘मुल्लांनी इराण सोडावे’ अशा घोषणा दिल्या जात आहेत. या आंदोलनांना सुरुवात झाल्यापासून आतापर्यंत 30 हून अधिक लोकांचा मृत्यू झाल्याचे समोर आले असून, हजारो लोकांना अटक करण्यात आल्याची माहिती आहे. इराणी अधिकाऱ्यांनी मृतांचा अधिकृत आकडा जाहीर केलेला नसला, तरी किमान दोन सुरक्षा दलांचे सदस्य ठार झाले असून, डझनभर जण जखमी झाल्याचे त्यांनी मान्य केले आहे.

---------------

हिंदुस्थान समाचार / Priyanka Bansode