अकोला, 11 ऑक्टोबर (हिं.स.)।

नवरात्रोत्सवाच्या पावन पर्वात माताराणीच्या चरणी श्रद्धेने अर्पण करण्यात येणारे हार, फुले, दूर्वा, बेलपत्र व अन्य निर्माल्य नदी, नाले तसेच जलस्रोतांमध्ये विसर्जित न करता त्याचे योग्य संकलन आणि पर्यावरणपूरक व्यवस्थापन व्हावे, या उद्देशाने अकोल्यात मागील १६ वर्षांपासून सुरू असलेला ‘निर्माल्य कलश रथ’ उपक्रम यंदाही राबविण्यात येत आहे. गुरुवार, दि. २२ ऑक्टोबर २०२६ रोजी सकाळी ९ वाजल्यापासून शहरातील विविध भागांत हा रथ फिरणार असून, अकोलेकरांनी आपल्या घरातील निर्माल्य कलश रथातच देऊन या उपक्रमाला सहकार्य करावे, असे आवाहन गटनेता तथा नगरसेवक निलेश रामकृष्ण देव यांनी केले आहे.

श्रद्धेला पर्यावरण संवर्धनाची जोड!

नवरात्रोत्सवात देवीच्या चरणी अर्पण केलेल्या फुलांचे आणि अन्य निर्माल्याचे विसर्जन अनेकदा पाण्यात केले जाते. त्यामुळे जलप्रदूषणाची समस्या निर्माण होण्याची शक्यता असते. धार्मिक श्रद्धा जपत निसर्गाचे संरक्षण करणे ही प्रत्येक नागरिकाची जबाबदारी आहे. याच सामाजिक आणि पर्यावरणपूरक विचारातून निलेश देव यांच्या पुढाकाराने मागील १६ वर्षांपासून निर्माल्य संकलनाची परंपरा सातत्याने सुरू आहे.

यंदाही गुरुवार, २२ ऑक्टोबर रोजी सकाळी ९ वाजता अशोक वाटिका येथून निर्माल्य कलश रथाच्या संकलन मोहिमेला सुरुवात होणार आहे. शहरातील विविध वस्त्या, अपार्टमेंट, सोसायट्या आणि प्रमुख परिसरांमध्ये निर्धारित वेळेनुसार हा रथ पोहोचणार आहे. नागरिकांनी निर्माल्य रस्त्यावर, नाल्यात किंवा पाण्यात न टाकता रथामध्येच जमा करावे, असे आवाहन करण्यात आले आहे.

अशोक वाटिकेपासून रात्री ८ वाजेपर्यंत विविध भागांत संकलन

निर्माल्य कलश रथाचे नियोजन शहरातील विविध परिसरांनुसार करण्यात आले असून, त्याचे वेळापत्रक पुढीलप्रमाणे आहे.

सकाळी ९ वाजता — अशोक वाटिका येथून प्रारंभ

जठारपेठेतील श्री. सौरभजी भगत यांची गल्ली, श्री. सुदर्शनजी देशपांडे यांची गल्ली, जकाते काका परिसर, प्रसाद कॉलनी, रामदूत अपार्टमेंट, अहिर काका परिसर, मनमोहनजी जोशी यांची गल्ली, कावेरी अपार्टमेंट, बबलूजी तिवारी परिसर, शिवाभाऊ मोकलकर यांची गल्ली आणि सिद्धिविनायक मंदिर, ज्योतीनगर परिसर.

त्यानंतर — बिर्ला व न्यू तापडियानगर परिसर

बिर्ला सी, रामा एम्पायर, अंबे अपार्टमेंट, अमृत सोसायटी, शंकर अपार्टमेंट, विजुभाऊ वाघ यांच्या दुकानाशेजारील गल्ली, राजसरोवर अपार्टमेंट, ऐकदंत अपार्टमेंट, सातपुते साहेब परिसर, ओंकार अपार्टमेंट, न्यू तापडियानगरमधील पाच गल्ल्या आणि महाजनी प्लॉट परिसर.

दुपारी १२ वाजल्यानंतर — विविध वस्त्या व अपार्टमेंट

निखिलेशजी दिवेकर यांची गल्ली, गोविंद अपार्टमेंट, अनिल मामा कौसल यांचा वाडा, विजयजी वाघ यांची गल्ली, अॅड. गणेश पाठक यांची गल्ली, राजुभाऊ सोनी यांची गल्ली, राजसरोवर अपार्टमेंट, मनोजजी सोमण यांची गल्ली, पंकजजी लाहोळे यांची गल्ली, शंकरनगरमधील अॅड. भरत देशपांडे यांच्या घराजवळील परिसर, माधवराव देशमुख यांचे अपार्टमेंट, दिलीपकाका देशपांडे यांचे वैभवलक्ष्मी अपार्टमेंट, हरताळकर काका यांची गल्ली, निखिलजी पांडे यांची गल्ली आणि अनिलजी सर यांची गल्ली.

दुपारी ४ वाजल्यानंतर: गुप्ते रोड, न्यू गुप्ते रोड व ब्राह्मण सभा रोड परिसर.

सायंकाळी ५ वाजल्यानंतर: उत्तरा कॉलनी परिसर.

सायंकाळी ६ वाजल्यानंतर: न्यू तापडियानगर परिसर.

रात्री ८ वाजल्यानंतर: गड्डम प्लॉट, रामदास पेठ व बिर्ला कॉलनी परिसर.

‘मातेला निरोप… पण निसर्गाला नाही!’

माताराणीच्या चरणी अर्पण केलेल्या हार, फुले, दूर्वा, बेलपत्र आणि अन्य निर्माल्याचे योग्य संकलन करून जलप्रदूषण रोखण्याच्या या उपक्रमात प्रत्येक नागरिकाचा सहभाग महत्त्वाचा आहे. धार्मिक परंपरा आणि पर्यावरण संवर्धन यांचा सुंदर समन्वय साधणारा हा उपक्रम अधिक व्यापक व्हावा, हीच अपेक्षा आहे.

“निर्माल्य पाण्यात नको, निर्माल्य कलश रथातच द्या!” या संदेशातून अकोलेकरांनी पर्यावरण रक्षणाचा संकल्प करावा. श्रद्धा जपत स्वच्छता राखणे आणि पुढील पिढ्यांसाठी निसर्गाचे संवर्धन करणे, हीच माताराणीच्या चरणी खरी सेवा ठरेल.

हा उपक्रम निलेश देव मित्र मंडळ, जठारपेठ, अकोला तसेच अॅड. धनश्री देव स्मृती सेवा प्रकल्प, अकोला यांच्या माध्यमातून राबविण्यात येत आहे.

अकोलेकरांनी या १६ वर्षांच्या पर्यावरणपूरक परंपरेत उत्स्फूर्त सहभाग नोंदवून स्वच्छ, सुंदर आणि पर्यावरणपूरक नवरात्रोत्सव साजरा करावा, असे आवाहन निलेश रामकृष्ण देव, गटनेता तथा नगरसेवक, वंचित बहुजन आघाडी, अकोला यांनी केले आहे.

---------------

हिंदुस्थान समाचार / जयेश गावंडे