पाकिस्तानी आणि मुस्लिम देशांतील क्रू सदस्यांच्या तैनातीवर निर्बंध

फ्लाय दुबई विमानातील अपहरणाच्या प्रयत्नानंतर इस्रायलचा निर्णय

तेलअवीव, १४ ऑक्टोबर (हिं.स.) : फ्लाय दुबईच्या विमानाशी संबंधित घटनेनंतर इस्रायलने परदेशी विमान कंपन्यांच्या वैमानिक आणि केबिन क्रू सदस्यांसाठी प्रवेशासंबंधीचे नियम कडक केले आहेत. या नव्या नियमांनुसार, इस्रायलशी राजनैतिक संबंध नसलेल्या काही देशांचे नागरिक किंवा त्या देशांचे दुहेरी नागरिकत्व असलेल्या कर्मचाऱ्यांना इस्रायलसाठीच्या विमानसेवेत तैनात करण्यावर निर्बंध लागू करण्यात आले आहेत. या नियमांचे पालन करत असल्याचे एअर फ्रान्सने स्पष्ट केले आहे.

एअर फ्रान्सकडून नियमांचे पालन करण्यास दुजोरा

एअर फ्रान्सने दिलेल्या निवेदनानुसार, प्रत्येक विमान कंपनीला ती सेवा पुरवत असलेल्या देशांच्या प्रवेशविषयक नियमांचे पालन करणे बंधनकारक आहे. हे नियम प्रवासी तसेच विमान कर्मचाऱ्यांनाही लागू होतात, असे कंपनीने स्पष्ट केले.तेल अवीवला जाणाऱ्या विमानांसाठी इस्रायली अधिकाऱ्यांनी लागू केलेल्या नव्या नियमांची माहिती संबंधित कर्मचाऱ्यांना देण्यात आल्याचेही एअर फ्रान्सने म्हटले आहे. त्यामुळे पात्रतेच्या निकषांमध्ये न बसणाऱ्या कर्मचाऱ्यांच्या तैनातीवर परिणाम होण्याची शक्यता आहे.

वृत्तांनुसार, इस्रायलच्या नव्या निर्देशांमध्ये ३१ देशांचा समावेश आहे. यामध्ये पाकिस्तान, इराण, ओमान, सौदी अरेबिया, अल्जेरिया, ट्युनिशिया आणि नायजर यांसारख्या देशांचा उल्लेख करण्यात आला आहे. या देशांपैकी अनेक देश मुस्लिमबहुल आहेत.मात्र, हे निर्बंध केवळ धर्माच्या आधारावर लागू करण्यात आल्याचे स्पष्ट झालेले नाही. उपलब्ध माहितीनुसार, इस्रायलशी संबंधित राजनैतिक संबंध आणि नागरिकत्वाच्या निकषांवर हे नियम आधारित आहेत.

इस्रायलच्या परिवहन आणि रस्ते सुरक्षा मंत्रालयाने १ ऑक्टोबर रोजी परदेशी विमान कंपन्यांना नव्या नियमांबाबत निर्देश दिल्याचे वृत्त आहे. इस्रायली हवाई हद्दीतून उड्डाण करणाऱ्या विमानांतील वैमानिक आणि केबिन क्रू सदस्यांच्या नागरिकत्वासंबंधी हे निर्देश असल्याचे सांगितले जात आहे.फ्लाय दुबईच्या विमानाशी संबंधित घटनेनंतर हे पाऊल उचलण्यात आल्याचे वृत्तांमध्ये नमूद करण्यात आले आहे. या घटनेत ओमानच्या एका वैमानिकाने विमानाचे अपहरण करण्याचा प्रयत्न केला होता. तर भारतीय कॅप्टन स्मित मच्छर यांनी प्रसंगावधान राखून विमान कोसळण्यापासून वाचवले होते.

आंतरराष्ट्रीय विमानसेवेवर परिणाम होण्याची शक्यता

इस्रायलच्या नव्या नियमांमुळे तेल अवीवसाठी उड्डाणे चालवणाऱ्या परदेशी विमान कंपन्यांना त्यांच्या कर्मचाऱ्यांच्या नागरिकत्वाची आणि पात्रतेची तपासणी करावी लागणार आहे. त्यामुळे काही कंपन्यांच्या कर्मचारी नियोजनावर आणि विमानसेवेच्या व्यवस्थापनावर परिणाम होऊ शकतो.एअर फ्रान्सने नियमांचे पालन करण्याची भूमिका स्पष्ट केली असली, तरी या निर्बंधांमुळे कंपनीच्या एकूण विमानसेवेवर किती परिणाम होणार आहे, याबाबत सविस्तर माहिती समोर आलेली नाही.

---------------------

हिंदुस्थान समाचार / Priyanka Bansode