इस्लामाबाद, 15 ऑक्टोबर (हिं.स.)।पाकिस्तानमधील पेशावर शहरात एका शाळेचे छत कोसळल्याने किमान २८ विद्यार्थी आणि एका शिक्षकाचा मृत्यू झाला आहे. गुरुवारी स्थानिक रुग्णालयाच्या प्रवक्त्याने ही माहिती दिली.

लेडी रीडिंग रुग्णालयाच्या (एलआरएच) प्रशासनाने सुरुवातीला या दुर्घटनेत चार जणांचा मृत्यू झाल्याची माहिती दिली होती. मात्र, त्यानंतर रुग्णालयात २८ मुलांचे मृतदेह आणण्यात आल्याचे सांगण्यात आले. लेडी रीडिंग हॉस्पिटलचे प्रवक्ते मुहम्मद आसिम यांनी सांगितले की, मृत मुलांचे वय १३ वर्षे किंवा त्यापेक्षा कमी होते.प्रवक्त्याने सांगितले की, रुग्णालयात आणीबाणीची परिस्थिती जाहीर करण्यात आली आहे. त्यांनी पुढे सांगितले की, जखमींपैकी काहींची प्रकृती चिंताजनक आहे.

दरम्यान, कॅपिटल सिटी पोलीस अधिकारी डॉ. मियाँ सईद यांनी सांगितले की, प्रांतीय राजधानीत शाळेचे छत कोसळल्याच्या या दुर्घटनेत ४० हून अधिक जण जखमी झाले आहेत.बचाव पथकांनी दिलेल्या प्राथमिक माहितीनुसार, शाळेचे छत कोसळल्यानंतर अनेक मुले ढिगाऱ्याखाली अडकली होती. बचाव अधिकाऱ्यांनी सांगितले की, मदत आणि बचावकार्य सुरू करण्यात आले असून, ढिगाऱ्याखाली अडकलेल्या विद्यार्थ्यांचा आणि शाळेतील कर्मचाऱ्यांचा शोध घेण्यासाठी पथके कार्यरत आहेत.

या घटनेबद्दल पाकिस्तानचे पंतप्रधान शाहबाज शरीफ यांनी दुःख व्यक्त केले आहे. पंतप्रधानांनी शोकग्रस्त कुटुंबांप्रती संवेदना व्यक्त केल्या आहेत आणि या भरून न येणाऱ्या नुकसानाचे दुःख सहन करण्यासाठी त्यांना धैर्य व संयम मिळो, अशी प्रार्थना केली आहे. दरम्यान, खैबर पख्तूनख्वा (केपी) प्रांतातील माहिती व जनसंपर्क विषयक राज्यपालांच्या सल्लागार समर हारून बिलौर यांनीही या दुर्घटनेबद्दल दुःख व्यक्त केले. तसेच, जखमी विद्यार्थ्यांना शक्य तितक्या उत्तम वैद्यकीय सुविधा उपलब्ध करून देण्याचे निर्देश त्यांनी दिले.

---------------

हिंदुस्थान समाचार / Priyanka Bansode