सना, 16 ऑक्टोबर (हिं.स.)।येमेनमध्ये हुती बंडखोर आणि सौदी अरेबिया यांच्यातील तणाव दिवसेंदिवस वाढत आहे. गुरुवारी हुती बंडखोरांनी येमेनमधील अदन येथील अल-मआशिक राष्ट्रपती राजवाड्याला लक्ष्य केले. या हल्ल्यात दोन सुरक्षा कर्मचाऱ्यांचा मृत्यू झाला, तर अन्य सहा जण जखमी झाले.

वृत्तानुसार, येमेनचे युवा मंत्री नायेफ सालेह अल-बकरी यांनी सांगितले की, अदनमध्ये उपस्थित असलेले मंत्रिमंडळातील सर्व मंत्री सुरक्षित आहेत. या हल्ल्यानंतरही सरकारचे सदस्य शहर सोडणार नसल्याचे त्यांनी स्पष्ट केले.हुती बंडखोर आणि सौदी अरेबिया यांच्यातील लष्करी संघर्ष सातत्याने तीव्र होत असताना हा हल्ला झाला आहे. याच्या एक दिवस आधी हुती बंडखोरांनी सौदी अरेबियातील ऊर्जा प्रकल्प आणि रियाध येथील आंतरराष्ट्रीय विमानतळाला लक्ष्य केल्याचा दावा केला होता.

बुधवारी हुतींचे लष्करी प्रवक्ते याह्या सरी यांनी दावा केला की, संघटनेने बॅलिस्टिक क्षेपणास्त्रे, क्रूझ क्षेपणास्त्रे आणि ड्रोनच्या मदतीने सौदी अरेबियातील अनेक ठिकाणांवर हल्ले केले. समाजमाध्यम मंच ‘एक्स’वर जारी केलेल्या निवेदनात सरी यांनी सांगितले की, या हल्ल्यांमध्ये सौदी अरेबियाच्या पूर्व प्रांतातील सौदी अरामकोचे प्रकल्प, रास तनुरा तेलशुद्धीकरण प्रकल्प आणि रियाधमधील किंग खालिद आंतरराष्ट्रीय विमानतळाला लक्ष्य करण्यात आले.

हुती प्रवक्त्याच्या म्हणण्यानुसार, या हल्ल्यांमुळे लक्ष्य करण्यात आलेल्या ठिकाणांवर मोठे नुकसान झाले आणि आग लागली. मात्र, या दाव्यांना स्वतंत्रपणे दुजोरा मिळालेला नाही. आगामी काळातही सौदी अरेबियाविरुद्ध हुतींची लष्करी मोहीम सुरू राहील, असा इशाराही सरी यांनी दिला.विमानतळे आणि तेल प्रकल्पांना संभाव्य लक्ष्य ठरवताना त्यांनी आंतरराष्ट्रीय जहाज वाहतूक कंपन्या, सर्वसामान्य नागरिक आणि संबंधित प्रकल्पांमध्ये काम करणाऱ्या कर्मचाऱ्यांना या ठिकाणांपासून दूर राहण्याचा सल्ला दिला. हुती बंडखोरांनी या ठिकाणांना आपल्या सशस्त्र दलांसाठी ‘वैध लक्ष्य’ घोषित केले आहे.

दरम्यान, वाढत्या तणावाच्या पार्श्वभूमीवर सौदी अरेबियाच्या नेतृत्वाखालील आघाडीने मंगळवारी येमेनची राजधानी सना येथील हुतींच्या नियंत्रणाखाली असलेल्या परिसरातील येमेन ऑइल कंपनीचे अल-सबाहाह केंद्रीय इंधन केंद्र रिकामे करण्याचे निर्देश दिले होते. संभाव्य लष्करी कारवाईपूर्वी नागरिकांनी परिसर सोडावा, असे आवाहन आघाडीचे प्रवक्ते मेजर जनरल तुर्की अल-मलिकी यांनी केले होते. त्यांनी समाजमाध्यम मंच ‘एक्स’वर संबंधित ठिकाणाचा सांकेतिक नकाशाही प्रसिद्ध केला होता.दुसरीकडे, सौदी नेतृत्वाखालील आघाडीने दावा केला की, नैऋत्य सौदी अरेबियातील खमिस मुशैत शहराच्या दिशेने डागण्यात आलेली दोन बॅलिस्टिक क्षेपणास्त्रे हवेतच रोखण्यात आली. याशिवाय, रियाधच्या उत्तरेकडे आलेली तीन मानवरहित हवाई वाहने म्हणजेच ड्रोन निष्क्रिय करण्यात आल्याची माहितीही आघाडीने दिली.याउलट, हुती बंडखोरांनी सौदी अरेबियाचे एक टेहळणी विमान पाडल्याचा दावा केला आहे. मात्र, या दाव्यांनाही स्वतंत्रपणे दुजोरा मिळालेला नाही.

येमेनमधील ताज्या घडामोडींमुळे प्रादेशिक सुरक्षा, ऊर्जा पुरवठा आणि सागरी व्यापाराबाबत चिंता वाढली आहे. विशेषतः लाल समुद्र आणि बाब-अल-मंडेब सामुद्रधुनीच्या सुरक्षेबाबत गंभीर प्रश्न उपस्थित झाले आहेत. आंतरराष्ट्रीय सागरी व्यापाराच्या दृष्टीने हा जलमार्ग अत्यंत महत्त्वाचा आहे.दरम्यान, येमेनमधील संघर्षाला २०१४ मध्ये तीव्र स्वरूप प्राप्त झाले. त्या वेळी हुती बंडखोरांनी राजधानी सनावर ताबा मिळवून आंतरराष्ट्रीय स्तरावर मान्यता असलेल्या सरकारला सत्तेवरून हटवले होते. त्यानंतर २०१५ मध्ये सौदी अरेबियाच्या नेतृत्वाखालील आघाडीने येमेन सरकारच्या समर्थनार्थ लष्करी हस्तक्षेप केला.

---------------

हिंदुस्थान समाचार / Priyanka Bansode