सिंगापूर शहर, 16 ऑक्टोबर (हिं.स.)।शेजारील देश इंडोनेशियातील जंगलांमध्ये आणि पीटलँड क्षेत्रात लागलेल्या आगीच्या धुरामुळे सिंगापूरमधील हवा विषारी बनत आहे. हवेची गुणवत्ता अत्यंत अस्वास्थ्यकारक पातळीवर पोहोचल्याने जनजीवन, पर्यटन आणि व्यवसायांवर परिणाम होत आहे. या परिस्थितीची गंभीर दखल घेत सिंगापूरचे पंतप्रधान लॉरेन्स वोंग यांनी आगीसाठी जबाबदार असलेल्या संभाव्य कंपन्यांविरोधात कायदेशीर कारवाई करण्याचे संकेत दिले आहेत. धुरामुळे दृश्यमानता कमी झाल्याने सेलेटर विमानतळावरील १६ विमानांचे मार्गही बदलावे लागले आहेत.

सिंगापूरच्या राष्ट्रीय पर्यावरण संस्थेच्या माहितीनुसार, इंडोनेशियातील कालीमंतान प्रदेशात लागलेल्या आगीचा धूर सातत्याने सिंगापूरच्या दिशेने येत आहे. सरकारी आकडेवारीनुसार, ४ सप्टेंबर रोजी सिंगापूरमधील हवेची गुणवत्ता जवळपास तीन वर्षांनंतर प्रथमच अस्वास्थ्यकारक पातळीवर पोहोचली होती. त्यानंतर धुराच्या समस्येमुळे चिंता अधिक वाढली आहे.परिस्थिती दिवसेंदिवस गंभीर होत आहे. हवेचा गुणवत्ता निर्देशांक (एक्यूआय) २५० च्या आसपास राहणे मानवी आरोग्यासाठी धोकादायक ठरू शकते.

पंतप्रधान लॉरेन्स वोंग यांनी समाजमाध्यमावरील ‘एक्स’ या मंचावर सांगितले की, इंडोनेशियातील जंगलांमध्ये आणि पीटलँड क्षेत्रात लागलेल्या आगींसाठी जबाबदार असू शकणाऱ्या कंपन्यांच्या भूमिकेची सरकार चौकशी करत आहे. परिस्थितीनुसार, सिंगापूरच्या सीमापार धूर प्रदूषणविरोधी कायद्यांतर्गत संबंधित कंपन्यांवर कायदेशीर कारवाई केली जाऊ शकते, असेही त्यांनी स्पष्ट केले. याशिवाय, इतर देशांच्या सहकार्याने उपाययोजना करण्याच्या पर्यायांचाही सरकार विचार करत आहे.

धुरामुळे सिंगापूरमधील बाहेरील उपक्रमांवर परिणाम होत असल्याचे वृत्त आहे. स्थानिक प्रसारमाध्यमांच्या माहितीनुसार, खुल्या जागेत भोजनाची व्यवस्था करणाऱ्या काही रेस्टॉरंट्स आणि हॉकर केंद्रांच्या व्यवसायात घट झाली आहे. मरीना बे सँड्सनेही दीर्घकाळ बाहेर राहावे लागणाऱ्या काही उपक्रमांना तात्पुरती स्थगिती दिली आहे. हॉटेल प्रशासनाच्या माहितीनुसार, पाहुण्यांना मास्क आणि हवा शुद्ध करणारी उपकरणे उपलब्ध करून दिली जात आहेत.

सिंगापूरच्या डिजिटल विकास आणि माहितीमंत्री जोसेफिन टिओ यांनी सांगितले की, आंतरराष्ट्रीय पाहुण्यांचे स्वागत करण्यासाठी ही परिस्थिती अनुकूल नाही. शहरात आयोजित करण्यात आलेल्या ‘सिंगापूर इंटरनॅशनल सायबर वीक’ या कार्यक्रमात १०० हून अधिक देशांतील १५ हजारांपेक्षा अधिक पाहुणे सहभागी झाले आहेत. सरकारने परिस्थितीचा अंदाज घेऊन आधीपासूनच तयारी केली होती आणि गरजू नागरिकांना मास्कचे वाटप सुरू केले होते. धुराची समस्या कमी करण्यासाठी सिंगापूरचे अधिकारी इंडोनेशियातील अधिकाऱ्यांच्या संपर्कात असून, गरज भासल्यास मदत करण्यास तयार आहेत.

धुराचा परिणाम केवळ सिंगापूरपुरता मर्यादित नसून शेजारील मलेशियालाही त्याचा फटका बसत आहे. मलेशियाचे अर्थमंत्री अमीर हमजा अझिझान यांनी या समस्येवर मात करण्यासाठी आग्नेय आशियाई देशांमध्ये समन्वयाने कारवाई करणे आवश्यक असल्याचे सांगितले. आगीवर नियंत्रण मिळवण्यासाठी मलेशियाने पाण्याचा मारा करणारी विमाने आणि इतर आवश्यक संसाधने उपलब्ध करून देण्याची तयारी दर्शवली आहे. या समस्येवर तोडगा काढण्यासाठी आग्नेय आशियाई राष्ट्रांच्या संघटनेच्या (आसियान) पातळीवर प्रयत्न होणे आवश्यक असल्याचेही त्यांनी अधोरेखित केले.

---------------

हिंदुस्थान समाचार / Priyanka Bansode