-८८ पदकांसह (२१ सुवर्ण, २६ रौप्य आणि ४१ कांस्य) भारत पदक तालिकेत चौथ्या स्थानावर

नवी दिल्ली, २२ ऑक्टोबर (हिं.स.)आशियाई पॅरा गेम्स २०२६ मध्ये भारतीय खेळाडूंची प्रभावी कामगिरी सुरूच आहे. खेळांच्या चौथ्या दिवशी भारताने ७ सुवर्णांसह एकूण २६ पदके जिंकली. भारतीय खेळाडूंनी पॅरा-ॲथलेटिक्स, तिरंदाजी, जलतरण, बॅडमिंटन आणि पॅरा-टेबल टेनिसमध्ये पदके जिंकून देशाच्या पदक तालिकेत भर घातली. शैलेश कुमार, शीतल देवी, तोमण कुमार, सुवर्णा राज, दिलीप गवीत, अंजनाबेन बुंबडिया आणि सोलैराज धर्मराज यांनी सुवर्णपदके जिंकली. ८८ पदकांसह (२१ सुवर्ण, २६ रौप्य आणि ४१ कांस्य) भारत पदक तालिकेत चौथ्या स्थानावर पोहोचला आहे.

पॅरा-ॲथलेटिक्सच्या पुरुषांच्या उंच उडी (T63) प्रकारात भारताने उत्कृष्ट कामगिरी करत तिन्ही पदके जिंकली. शैलेश कुमारने १.८९ मीटरच्या आशियाई क्रीडा स्पर्धेतील विक्रमी उडीसह सुवर्णपदक पटकावले. वरुण भाटीने १.८४ मीटरच्या उडीसह रौप्यपदक, तर राहुलने १.८१ मीटरच्या वैयक्तिक सर्वोत्तम उडीसह कांस्यपदक पटकावले.

तिरंदाजीमध्ये, शीतल देवीने सिंगापूरच्या नूर अलीमला हरवून महिलांच्या कंपाऊंड प्रकारात सुवर्णपदक जिंकले. शीतलने तोमन कुमारसोबत कंपाऊंड मिश्र सांघिक प्रकारातही सुवर्णपदक जिंकून या स्पर्धेत दोन सुवर्णपदके मिळवली. दरम्यान, महिलांच्या W1 सुवर्णपदकाच्या लढतीत चीनच्या सेन मेंगकनकडून पराभूत झाल्यानंतर स्वाती चौधरीला रौप्यपदक मिळाले.

पॅरा ॲथलेटिक्समधील महिलांच्या थाळीफेक (F54) प्रकारात सुवर्णा राजने सुवर्णपदक जिंकले. दिलीप गवीतने पुरुषांच्या ४०० मीटर टी४७ प्रकारात ४८.२७ सेकंदांची वेळ नोंदवत सुवर्णपदक जिंकले. यापूर्वी त्याने १०० मीटर टी४७ प्रकारातही सुवर्णपदक पटकावले होते. याच प्रकारात, भाविक भरवाडने सुरुवातीला रौप्यपदक जिंकले होते, पण लेन उल्लंघनाबद्दल आक्षेप नोंदवल्यानंतर त्याला अपात्र ठरवण्यात आले. दुसऱ्यांदा लेन उल्लंघन केल्यामुळे त्याचा निकाल रद्द करण्यात आला.

अंजनाबेन बुंबाडियाने महिलांच्या ४०० मीटर टी४७ प्रकारात ५९.९७ सेकंदांची वेळ नोंदवत सुवर्णपदक जिंकले, तर जयंती बेहराने १ मिनिट ०.६५ सेकंदांची वेळ नोंदवत रौप्यपदक पटकावले. तेजलबेन दामोरने महिलांच्या ४०० मीटर टी१२ प्रकारात ५७.६० सेकंदांची वेळ नोंदवत रौप्यपदक जिंकले. पुरुषांच्या लांब उडी T44/T62/T64 प्रकारात, सोलैराज धर्मराजने ७.१५ मीटरच्या आशियाई क्रीडा स्पर्धेतील विक्रमी उडीसह सुवर्णपदक जिंकून आपले विजेतेपद कायम राखले.

पॅरा-जलतरणात, कपिल कुमारने पुरुषांच्या ४०० मीटर फ्रीस्टाइल S10 प्रकारात ४ मिनिटे ३८.४४ सेकंदांची वेळ नोंदवून रौप्यपदक जिंकले. रवी कार्तिक बुडिगिनाने पुरुषांच्या ५० मीटर फ्रीस्टाइल S13 प्रकारात २५.८९ सेकंदांची वेळ नोंदवून कांस्यपदक जिंकले. स्वस्तिक पाटीलने पुरुषांच्या १०० मीटर ब्रेस्टस्ट्रोक SB9 प्रकारात १:१३.७७ सेकंदांची वेळ नोंदवून कांस्यपदक जिंकले. तेजस नंदकुमारने पुरुषांच्या १०० मीटर बॅकस्ट्रोक S7 प्रकारात १:१८.५८ सेकंदांची वेळ नोंदवून कांस्यपदक जिंकले. रावण्नी वलसनेनीने महिलांच्या ४०० मीटर टी११ प्रकारात कांस्य पदकही जिंकले.

भारतीय खेळाडूंनी पॅरा बॅडमिंटनमध्ये अनेक पदके मिळवली. मिश्र दुहेरी एसएल३-एसयू५ उपांत्य फेरीत, मनीषा रामदास आणि प्रमोद भगत इंडोनेशियाच्या लिआनी ओक्टिला आणि हिकमत रामदानी यांच्याकडून २१-१६, १३-२१, १७-२१ ने पराभूत झाले. या भारतीय जोडीने कांस्य पदक जिंकले. मिश्र दुहेरी एसएच६ उपांत्य फेरीत, नित्या श्री सुमती सिवन आणि कृष्णा नागर इंडोनेशियाच्या रीना मार्लिना आणि सुभान यांच्याकडून २१-१४, २१-१८ ने पराभूत झाले. या भारतीय जोडीने कांस्य पदक जिंकले.

पुरुष दुहेरी एसएल३-एसयू५ उपांत्य फेरीत, सूर्यकांत यादव आणि नवीन शिवकुमार इंडोनेशियाच्या सूर्यो नुग्रोहो आणि मुहम्मद अल इम्रान यांच्याकडून २१-८, १९-२१, २१-१६ ने पराभूत झाले. या पराभवानंतरही, भारतीय जोडीने कांस्यपदक मिळवले. पुरुष एकेरी SL4 उपांत्य फेरीत, सुहास यतिराज इंडोनेशियाच्या फ्रेडी सेटियावानकडून २३-२१, ८-२१, २१-१५ ने पराभूत झाला, ज्यामुळे सुहासला कांस्यपदक मिळाले. महिला एकेरी SL3 उपांत्य फेरीत, संजना कुमारी जपानच्या शिनो कावाईकडून २१-७, २१-९ ने पराभूत झाली आणि तिला कांस्यपदकावर समाधान मानावे लागले.

पुरुष एकेरी SL4 च्या दुसऱ्या उपांत्य फेरीत, नवीन शिवकुमारने अभिजीत सुखजाला २१-१३, २१-१५ ने पराभूत करून पुढील फेरीत प्रवेश केला. अभिजीतने कांस्यपदक जिंकले. पुरुष एकेरी SL3 मध्ये, प्रमोद भगतने दक्षिण कोरियाच्या ली सेउंगहूला १६-२१, २१-१८, २१-१७ ने पराभूत करून अंतिम फेरीत प्रवेश केला. महिला एकेरी SU5 मध्ये, थुलासिमथी मुरुगेसनने मनीषा रामदासचा १९-२१, २१-१५, २१-१३ असा पराभव करून अंतिम फेरीत प्रवेश केला. महिला एकेरी SH6 मध्ये, नित्या श्री सुमती सिवनने चीनच्या लिन शुआंगबाओचा पराभव करून अंतिम फेरीत प्रवेश केला. पुरुष एकेरी SL3 मध्ये, नितेश कुमारने इंडोनेशियाच्या मुहम्मद अल इम्रानचा पराभव करून अंतिम फेरीत प्रवेश केला.

मिश्र दुहेरी क्लास XD7 पॅरा टेबल टेनिस स्पर्धेच्या उपांत्य फेरीत, भावना पटेल आणि शुभम वाधवा दक्षिण कोरियाच्या जांग योंगजिन आणि ली मिंग्यू यांच्याकडून पराभूत झाले. भारतीय जोडीने कांस्यपदक जिंकले.

---------------

हिंदुस्थान समाचार / वृषाली देशपांडे