कीव , 23 ऑक्टोबर (हिं.स.)।युक्रेनचे राष्ट्राध्यक्ष वोलोदिमिर झेलेन्स्की यांनी रशियावरील अमेरिकी निर्बंधांमध्ये शिथिलता देण्याच्या निर्णयाचे समर्थन केलेले नाही. युक्रेन आणि अमेरिका यांच्यातील संबंध बिघडत असताना झेलेन्स्की यांचे हे ताजे विधान समोर आले आहे. आपण अमेरिकी राष्ट्राध्यक्ष डोनाल्ड ट्रम्प यांच्या विरोधात नसून त्यांच्याशी असलेले मतभेद वैयक्तिक स्वरूपाचे नाहीत, असे झेलेन्स्की यांनी स्पष्ट केले. मात्र, रशियावरील निर्बंधांमध्ये दिलेली सूट युक्रेनच्या हिताविरोधात असल्याचे त्यांनी म्हटले. या सवलतीमुळे रशियाचे सैन्य युद्ध अधिक काळ लांबवू शकते, अशी भीतीही त्यांनी व्यक्त केली.

झेलेन्स्की यांनी गुरुवारी माध्यमांना सांगितले की, रशियावरील निर्बंध शिथिल केल्यास युद्ध संपवण्याच्या प्रयत्नांना धक्का बसेल. रशियाचे राष्ट्राध्यक्ष व्लादिमिर पुतिन यांना युद्ध संपवायचे नाही, असा आरोपही त्यांनी केला. ते म्हणाले, “जर निर्बंध हटवले गेले, तर आम्ही ते अधिक कठोर करू.”

गेल्या काही दिवसांपासून अमेरिका रशियाबाबत नरम भूमिका घेत असल्याचे चित्र आहे. त्याचवेळी ट्रम्प आणि झेलेन्स्की यांच्यातील संबंध बिघडल्याच्या बातम्याही समोर येत आहेत.

अमेरिकेवर टीका करण्यामागे झेलेन्स्की यांची दोन प्रमुख कारणे आहेत. पहिले म्हणजे, अमेरिकेने रशियाकडून तेल खरेदी करण्यास सहमती दर्शवली आहे. या कराराला ट्रम्प यांनीच मंजुरी दिली आहे. विशेष म्हणजे, यापूर्वी ते पुतिन यांच्यावर युद्ध संपवण्यासाठी दबाव आणत होते.

दुसरे कारण म्हणजे, एलॉन मस्क यांच्या कंपनीच्या माध्यमातून चालवल्या जाणाऱ्या ‘स्टारलिंक’ या उपग्रहाधारित इंटरनेट सेवेच्या वापरावरील निर्बंधांमुळे युक्रेनला अडचणींचा सामना करावा लागत आहे.

यापूर्वी ट्रम्प यांनी म्हटले होते की, चर्चेदरम्यान निर्बंध लादल्यास संभाव्य करार धोक्यात येऊ शकतो. ते म्हणाले होते, “जेव्हा तुम्ही एखाद्या कराराच्या जवळ पोहोचलेले असता आणि चर्चा अत्यंत नाजूक टप्प्यावर असते, तेव्हा निर्बंध लादू नयेत.”दरम्यान, बुधवारी अमेरिकी परराष्ट्रमंत्री मार्को रुबिओ यांनी या मतभेदांवर तोडगा काढण्यासाठी काही विधायक कल्पना समोर आल्याचे सांगितले होते.

---------------

हिंदुस्थान समाचार / Priyanka Bansode