रियाध, 04 ऑक्टोबर (हिं.स.)।येमेनच्या आंतरराष्ट्रीय स्तरावर मान्यताप्राप्त सरकारने सना आणि सादा येथे हुती बंडखोरांच्या महत्त्वाच्या ठिकाणांवर हल्ले केल्याची पुष्टी केली. हुती गटाने सौदी अरेबियाची राजधानी रियाध येथे देशातील सर्वात मोठी तेल कंपनी असलेल्या अरामकोच्या सुविधांना लक्ष्य करून क्षेपणास्त्रे आणि ड्रोनच्या माध्यमातून हल्ला केल्याचा दावा केल्यानंतर ही कारवाई करण्यात आली.

अरामकोच्या प्रकल्पातून उठणाऱ्या आगीच्या ज्वाळा आणि दाट धुरामुळे चिंता वाढली आहे. सौदी अरेबियाची ही मोठी तेल कंपनी तेलाच्या पुरवठ्यात महत्त्वाची भूमिका बजावते. त्यामुळे या हल्ल्यात प्रकल्पाचे मोठे नुकसान झाले असल्यास तेलाचा पुरवठा प्रभावित होण्याची शक्यता आहे. याचा परिणाम आंतरराष्ट्रीय बाजारावरही होऊ शकतो आणि कच्च्या तेलाच्या किमतीत वाढ होण्याची शक्यता आहे.

पश्चिम आशियात आधीच तणावाचे वातावरण आहे. अशा परिस्थितीत अरामकोवर झालेल्या हल्ल्यामुळे ऊर्जा बाजारासमोर नवी चिंता निर्माण होऊ शकते. या घटनांमुळे सुरू असलेला संघर्ष आणखी तीव्र झाला आहे. दोन्ही बाजूंनी लष्करी कारवाई केल्याचे दावे करत निवेदने जारी केली आहेत.

येमेनच्या आंतरराष्ट्रीय स्तरावर मान्यताप्राप्त सरकारच्या सशस्त्र दलांच्या मीडिया सेंटरकडून जारी करण्यात आलेल्या निवेदनात अधिकृत प्रवक्त्याने सांगितले की, येमेनचे सैन्य हुतींच्या नियंत्रणाखालील भागांवर हल्ले करत आहे.अधिकृत प्रवक्त्याने म्हटले, “आम्ही सना आणि सादा येथे दहशतवादी हुती मिलिशियाच्या महत्त्वाच्या ठिकाणांवर जोरदार हल्ले करत आहोत.” हुतींच्या लष्करी क्षमतेला लक्ष्य करणारे हल्ले सुरूच राहतील, असा इशाराही प्रवक्त्याने दिला. प्रवक्त्याने म्हटले, “हुती मिलिशियाची लष्करी क्षमता आमच्या सैन्याच्या हल्ल्यांपासून सुरक्षित राहणार नाही. आम्ही ती नष्ट करू.”हे निवेदन हुती गटाने रियाधमधील अरामकोला लक्ष्य करून बॅलिस्टिक क्षेपणास्त्रे आणि ड्रोनच्या माध्यमातून लष्करी कारवाई केल्याचा दावा केल्यानंतर आले आहे.

हुतींचे लष्करी प्रवक्ते ब्रिगेडियर जनरल याह्या सरी यांच्या निवेदनानुसार, सौदी अरेबियाने सना आणि हुतींच्या नियंत्रणाखालील इतर भागांवर केलेल्या हल्ल्यांना प्रत्युत्तर म्हणून ही कारवाई करण्यात आली.हुतींच्या निवेदनात म्हटले आहे की, “सना आणि मुक्त करण्यात आलेल्या प्रांतांवर सौदी अरेबियाकडून करण्यात आलेल्या आक्रमणाला प्रत्युत्तर म्हणून ही कारवाई करण्यात आली. गेल्या २४ तासांत ६० हवाई आणि क्षेपणास्त्र हल्ले करण्यात आले असून, येमेनविरोधातील सौदी हल्ल्यांची एकूण संख्या १,४१० झाली आहे.”

हुती गटाने रियाधमधील अरामकोच्या सुविधांवर बॅलिस्टिक क्षेपणास्त्रे आणि ड्रोनच्या माध्यमातून विशेष लष्करी कारवाई केल्याचा दावा केला. ही कारवाई आपल्या उद्दिष्टात यशस्वी ठरल्याचे आणि लक्ष्य करण्यात आलेल्या ठिकाणी आग लागल्याचेही गटाने म्हटले आहे.

निवेदनात म्हटले आहे, “अल्लाहच्या कृपेने ही कारवाई यशस्वीपणे आपल्या उद्दिष्टापर्यंत पोहोचली.” तसेच, “हल्ले अचूक आणि थेट होते. त्यामुळे लक्ष्य करण्यात आलेल्या ठिकाणी आग लागली,” असा दावा करण्यात आला. हुतींच्या निवेदनात पुढील काळात तणाव आणखी वाढण्याचा इशाराही देण्यात आला. येमेन आणि येमेनी जनतेविरोधातील हल्ल्यांना प्रत्युत्तर दिले जाईल, असे गटाने स्पष्ट केले.

निवेदनात म्हटले आहे, “इतक्या क्रूरपणे आणि अमानुषपणे येमेनी जनतेचे रक्त सांडले जात असल्याने सशस्त्र दलांना देशातील सर्व स्वतंत्र नागरिकांसोबत आवश्यक ती सर्व पावले उचलणे आणि कठोर उपाययोजना करणे भाग पडले आहे. येमेनी जनतेच्या रक्ताची किंमत मोठी आणि गंभीर असेल, हे सर्वांना समजले पाहिजे. आमच्या जनतेचे रक्त सांडत राहिल्यास शत्रूला त्याची मोठी किंमत चुकवावी लागेल.”

हुती गटाने पुढे म्हटले की, येमेनविरोधातील हल्ले आणि नाकेबंदी संपेपर्यंत तणाव वाढविण्याचे धोरण सुरूच ठेवले जाईल.निवेदनात म्हटले आहे, “आम्ही ‘नाकेबंदीला नाकेबंदीने’ आणि ‘तणावाला तणावाने’ प्रत्युत्तर देण्याचे धोरण सुरूच ठेवू. आक्रमकता थांबेपर्यंत आणि आमच्या प्रिय देशावरील नाकेबंदी उठवली जाईपर्यंत सौदी शत्रूच्या सैन्याच्या तैनातीला लक्ष्य करत राहू.”

---------------

हिंदुस्थान समाचार / Priyanka Bansode