नवी दिल्ली, 06 ऑक्टोबर (हिं.स.)न्यूझीलंड दौऱ्यासाठी भारतीय टी-२० संघ जाहीर झाला आहे. श्रेयस अय्यरच्या नेतृत्वाखाली पाच टी-२० सामन्यांसाठी संघाची निवड करण्यात आली आहे. ध्रुव जुरेलच्या नेतृत्वाखालील भारत 'अ' संघही जाहीर झाला आहे. न्यूझीलंडविरुद्धच्या एकदिवसीय आणि कसोटी मालिकेसाठी संघ नंतर निवडले जातील. वेगवान गोलंदाज भुवनेश्वर कुमारचा भारतीय टी-२० संघात समावेश करण्यात आला आहे. तो चार वर्षांनंतर भारतीय संघात परतत आहे. २०२२ मध्ये त्याला संघातून वगळण्यात आले होते आणि तेव्हापासून तो भारतीय संघाचा भाग नव्हता. हर्षित राणा, नितीश कुमार रेड्डी, हार्दिक पांड्या आणि जसप्रीत बुमराह यांचा संघात समावेश नाही. नितीश आणि बुमराह यांना एकदिवसीय आणि कसोटी मालिकेसाठी विश्रांती देण्यात आली आहे. हर्षित आणि हार्दिक तंदुरुस्तीच्या समस्यांमुळे संघाबाहेर आहेत. वेगवान गोलंदाज प्रसिद्ध कृष्णालाही याच कारणास्तव वगळण्यात आले आहे.

भारत आणि न्यूझीलंड यांच्यातील टी-२० मालिका २२ ऑक्टोबरपासून सुरू होईल. यामध्ये पाच सामने खेळले जातील. भारताने २०२० मध्ये न्यूझीलंड दौऱ्यातही केवळ पाच टी-२० आंतरराष्ट्रीय सामने खेळले होते. सध्याच्या दौऱ्यासाठी फलंदाजीच्या फळीत सर्व प्रमुख क्रिकेटपटूंचा समावेश करण्यात आला आहे. गोलंदाजीच्या फळीत अर्शदीप आणि भुवी यांच्यासोबत मयंक यादव आणि प्रिन्स यादव यांचाही समावेश आहे. लेग-स्पिनर वरुण चक्रवर्तीचेही पुनरागमन झाले आहे. दुखापतीमुळे तो नुकताच अफगाणिस्तान आणि वेस्ट इंडिज मालिकेमधून बाहेर झाला होता.

भुवनेश्वर कुमारचे पुनरागमन हे भारतीय टी-२० संघ निवडीचे मुख्य आकर्षण आहे. त्याचा शेवटचा आंतरराष्ट्रीय सामना डिसेंबर २०२२ मध्ये न्यूझीलंडविरुद्ध झाला होता. त्याने आतापर्यंत भारतासाठी ८७ टी-२० आंतरराष्ट्रीय सामने खेळले असून, ६.९६ च्या इकॉनॉमी रेटने ९० बळी घेतले आहेत. गेल्या दोन आयपीएल हंगामात रॉयल चॅलेंजर्स बंगळूरसाठी केलेल्या प्रभावी कामगिरीमुळे भुवीची निवड करण्यात आली आहे. आयपीएल २०२६ मध्ये, त्याने १६ सामन्यांमध्ये ७.९५ च्या इकॉनॉमी रेटने २८ बळी घेतले. आयपीएल २०२५ मध्ये, त्याने १४ सामन्यांमध्ये ९.२८ च्या इकॉनॉमी रेटने १७ बळी घेतले. आरसीबीच्या सलग दोन विजयांमध्ये भुवीच्या गोलंदाजीने महत्त्वाची भूमिका बजावली.

न्यूझीलंड दौऱ्यासाठी भारतीय टी२० संघ

श्रेयस अय्यर (कर्णधार), तिलक वर्मा (उपकर्णधार), अभिषेक शर्मा, संजू सॅमसन (यष्टीरक्षक), वैभव सूर्यवंशी, ईशान किशन (यष्टीरक्षक), अक्षर पटेल, शिवम दुबे, नितीश कुमार रेड्डी, नमन धीर, प्रिन्स यादव, मयंक यादव, अर्शदीप सिंग, भुवनेश्वर कुमार, वरुण चक्रवर्ती, कुलदीप यादव.

ध्रुव जुरेलच्या नेतृत्वाखाली न्यूझीलंड 'अ' संघाविरुद्धच्या तीन अनधिकृत कसोटी सामन्यांसाठी भारत 'अ' संघाची निवड करण्यात आली आहे. केएल राहुल, यशस्वी जैस्वाल, देवदत्त पडिक्कल, ऋषभ पंत आणि साई सुदर्शन यांचीही निवड झाली आहे. हे सर्व भारतीय कसोटी संघाचे महत्त्वाचे सदस्य आहेत. मात्र, पंतला तंदुरुस्ती चाचणी उत्तीर्ण करावी लागेल. त्यांच्या दुखापतींचे नेमके स्वरूप उघड करण्यात आले नाही. गोलंदाजांमध्ये आकिब नबी, आकाश दीप, मुकेश कुमार आणि अंशुल कंबोज यांचा समावेश आहे. यापैकी तिघांचा भारतीय कसोटी संघात समावेश होऊ शकतो.

न्यूझीलंड दौऱ्यासाठी भारत अ संघ

ध्रुव जुरेल (कर्णधार, यष्टिरक्षक), यशस्वी जैस्वाल, केएल राहुल, देवदत्त पडिक्कल, रविचंद्रन अश्विन, ऋषभ पंत* (यष्टीरक्षक), वॉशिंग्टन सुंदर, आकिब नबी, आकाश दीप, अंशुल कंबोज, मानव सुथार, मुकेश चौधरी, साई सुदर्शन, यश राठोड, मुकेश कुमार.

---------------

हिंदुस्थान समाचार / वृषाली देशपांडे