नंदुरबार, 09 ऑक्टोबर (हिं.स.)अन्न व औषध प्रशासनाच्या पथकाने गोपनीय माहितीच्या आधारे नंदुरबार शहर हद्दीत महाराष्ट्रात प्रतिबंधित असलेला विमल पान मसालाची वाहतूक करणारे आयशर वाहन पकडून कारवाई केली असून एकूण अंदाजित ६९ लाख ४७ हजार १५० रुपये किमतीचा मुद्देमाल जप्त करण्यात आला आहे. अशी माहिती अन्न व औषध प्रशासन सहायक आयुक्त सपना गोडसे पाटील यांनी दिली आहे. नंदुरबार शहरातील करण चौफुली ते जकातफाटी रस्त्यावर, करण चौफुलीजवळ धुळेकडे जाणारे वाहन क्रमांक एम एच ४८ – डि क्यु – ६०६२ अडवून तपासणी करण्यात आली. तपासणीत वाहनामध्ये राज्यात प्रतिबंधित असलेला विमल पान मसाला व वी-१ तंबाखू आढळून आले.तपासणीत आढळून आलेल्या प्रतिबंधित अन्न पदार्थांची अंदाजे किंमत ३९ लाख ४७ हजार १५० रुपये, तर वाहतुकीसाठी वापरण्यात आलेल्या आयशर वाहनाची अंदाजे किंमत ३० लाख रुपये आहे.असे एकूण अंदाजित ६९ लाख ४७ हजार १५० रुपये किमतीचा मुद्देमाल जप्त करण्यात आला. ही कारवाई अन्न सुरक्षा अधिकारी तुषार देवरे, सुरेंद्र रोहित डौले, संकेत आबा सदाफुळे यांच्या पथकाने केली. कारवाई आयुक्त तुकाराम मुंडे, सहआयुक्त मंगेश माने व सहाय्यक आयुक्त सपना गोडसे पाटील यांच्या मार्गदर्शनाखाली करण्यात आली.या प्रकरणी वाहनचालक मोहम्मद हलीम व इतर संबंधितांविरुद्ध नंदुरबार शहर पोलीस ठाण्यात फिर्याद दाखल करण्यात आली आहे. महाराष्ट्रात प्रतिबंधित अन्न पदार्थांचे उत्पादन, साठवणूक, वाहतूक व विक्री यावर सातत्याने विभागामार्फत लक्ष ठेवण्यात येत असून अशा प्रकारच्या गैरप्रकार करणाऱ्यांविरुद्ध यापुढेही कठोर कायदेशीर कारवाई करण्यात येईल, असेही अन्न व औषध प्रशासनाने कळविले आहे.

---------------

हिंदुस्थान समाचार / मनोहर कांडेकर