नवी दिल्ली, 01 नोव्हेंबर (हिं.स.)। आलिशान मोटारनिर्मिती क्षेत्रातील प्रसिद्ध कंपनी लँड रोव्हरने भारतात आपली नवी ‘रेंज रोव्हर एसव्ही सवाई कलेक्शन’ ही खास मालिका सादर केली आहे. या आलिशान मोटारीची एक्स-शोरूम किंमत तब्बल ४.९० कोटी रुपये ठेवण्यात आली आहे. या कलेक्शनचे वैशिष्ट्य म्हणजे कंपनीने याच्या केवळ १८ मोटारी तयार केल्या आहेत. राजस्थानमधील जयपूर, जोधपूर आणि जैसलमेर या तीन ऐतिहासिक शहरांच्या वास्तुकला आणि सांस्कृतिक वारशापासून प्रेरणा घेऊन या मोटारींची रचना करण्यात आली आहे.

भारतीय बाजारपेठेसाठी खास तयार करण्यात आलेली ही कंपनीची तिसरी विशेष बेस्पोक मालिका आहे. यापूर्वी कंपनीने एसव्ही रणथंभोर आणि एसव्ही मसारा या विशेष आवृत्त्या सादर केल्या होत्या. नव्या कलेक्शनमध्ये सवाई जयपूर, सवाई जोधपूर आणि सवाई जैसलमेर अशा तीन आवृत्त्यांचा समावेश आहे. प्रत्येक आवृत्तीच्या केवळ सहा मोटारी तयार करण्यात आल्या आहेत. त्यामुळे या संपूर्ण मालिकेच्या केवळ १८ मोटारी ग्राहकांना उपलब्ध होणार आहेत.

या तिन्ही मोटारींमध्ये २३ इंचांचे शॅम्पेन रंगाचे अलॉय व्हील, अॅटलस सिल्व्हर एक्स्टेरिअर पॅक आणि २४ कॅरेट सोन्याचा मुलामा दिलेले रेंज रोव्हरचे चिन्ह देण्यात आले आहे. प्रत्येक मोटारीमध्ये संबंधित आवृत्तीचे नाव आणि ‘१ ऑफ ६’ असे नमूद असलेली खास पट्टीही देण्यात आली आहे.

सवाई जयपूर आवृत्तीला गुलाबी शहर म्हणून ओळखल्या जाणाऱ्या जयपूरपासून प्रेरणा मिळाली आहे. या मोटारीला गुलाबी छटेचा बाह्य रंग, तर आतील भागात इक्रू आणि गडद गार्नेट रंगसंगती देण्यात आली आहे. आसनांवरील भरतकाम जयपूरच्या प्रसिद्ध हवा महालातील झरोखा रचनेवर आधारित आहे.

सवाई जोधपूर आवृत्तीमध्ये जोधपूरच्या निळ्या शहराची ओळख जपण्यात आली आहे. या मोटारीला फिकट निळा बाह्य रंग आणि पर्लिनो व रिव्हिएरा रंगसंगतीचे आतील सजावट देण्यात आली आहे. आसनांवरील भरतकाम जोधपूरच्या ऐतिहासिक महाल आणि किल्ल्यांमधील जाळीदार नक्षीकामापासून प्रेरित आहे. तर सवाई जैसलमेर आवृत्तीमध्ये सुवर्ण शहराची झलक पाहायला मिळते. सोनेरी बाह्य रंग, पर्लिनो आणि कॅरवे रंगसंगती तसेच स्थानिक हस्तकला आणि जैसलमेर किल्ल्यापासून प्रेरित नक्षीकाम हे तिचे वैशिष्ट्य आहे.

या तिन्ही मोटारी लाँग व्हीलबेस रेंज रोव्हर एसव्हीवर आधारित असून त्यामध्ये चार आसनांची व्यवस्था आहे. मागील प्रवाशांसाठी आरामदायी आसने, गरम-थंड सुविधा, मसाज, मनोरंजनासाठी पडदे आणि फोल्डिंग टेबल देण्यात आले आहेत.

इंजिनच्या बाबतीत या मोटारींमध्ये ४.४ लिटर ट्विन टर्बो पेट्रोल व्ही-८ इंजिन आहे. हे इंजिन ५३७ अश्वशक्तीची ताकद आणि ७५० एनएम टॉर्क निर्माण करते. यासोबत आठ गिअरचे स्वयंचलित गिअरबॉक्स देण्यात आले आहे. भारतीय संस्कृती आणि आधुनिक आलिशान सुविधांचा संगम असलेले हे कलेक्शन विशेष आकर्षण ठरत आहे.

---------------

हिंदुस्थान समाचार / Suraj Chaugule