सारब्रुकन (जर्मनी), 01 नोव्हेंबर (हिं.स.) दोन वेळा ऑलिम्पिक पदक विजेती पी. व्ही. सिंधू 'हायलो ओपन सुपर ५००' स्पर्धेच्या अंतिम फेरीत पोहोचली आहे. सलग दुसऱ्यांदा तिने बीडब्ल्यूएफ वर्ल्ड टूरच्या अंतिम फेरीत धडक मारली आहे. पुरुष एकेरीत, लक्ष्य सेनने टोमा ज्युनियर पोपोव्हचा पराभव करून अंतिम फेरी गाठली.

गेल्या आठवड्यात 'फ्रेंच ओपन'मध्ये उपविजेतेपद पटकावल्यानंतर, उपांत्य फेरीत सिंधूने अनमोल खरबचा २१-१३, २१-१६ असा पराभव केला. ३८ मिनिटे चाललेला हा सामना या दोन भारतीय खेळाडूंमधील पहिलाच आंतरराष्ट्रीय सामना होता. या स्पर्धेत सिंधूने आतापर्यंत एकही गेम न गमावता आपला विजयी प्रवास सुरू ठेवला आहे.अंतिम फेरीत सिंधूचा सामना डेन्मार्कच्या लाईन होजमार्क क्यर्सफेल्डशी होणार आहे.

पुरुष एकेरीत लक्ष्य सेननेही अंतिम फेरीत स्थान मिळवले आहे. त्याने फ्रान्सच्या सहाव्या मानांकित टोमा ज्युनियर पोपोव्हचा ४१ मिनिटांच्या लढतीत २१-१७, २१-१३ असा पराभव केला. या विजयामुळे लक्ष्य सेनने त्यांच्यातील परस्पर लढतींच्या विक्रमात ३-२ अशी आघाडी घेतली आहे. या हंगामात लक्ष्य सेन दुसऱ्यांदा अंतिम फेरीत पोहोचला आहे; याआधी तो या वर्षाच्या सुरुवातीला 'ऑल इंग्लंड ओपन'मध्ये उपविजेता ठरला होता.

यापूर्वी, २०२४ च्या 'सैयद मोदी इंडिया इंटरनॅशनल' स्पर्धेत सिंधू आणि लक्ष्य दोघेही एकाच स्पर्धेच्या अंतिम फेरीत पोहोचले होते.विशेष म्हणजे, डेन्मार्कच्या लाईन क्यर्सफेल्डविरुद्धच्या हेड-टू-हेड विक्रमात सिंधू ६-१ अशी आघाडीवर आहे. क्यर्सफेल्डने सिंधूविरुद्धचा एकमेव विजय गेल्या वर्षीच्या 'सुदीरमन कप'मध्ये मिळवला होता, तर या वर्षाच्या सुरुवातीला 'इंडोनेशिया मास्टर्स'मध्ये सिंधूने तिला पराभूत केले होते.

---------------

हिंदुस्थान समाचार / वृषाली देशपांडे