कुमामोटो, 13 नोव्हेंबर (हिं.स.)। भारताचा स्टार बॅडमिंटनपटू लक्ष्य सेन याने जपान मास्टर्स २०२६ स्पर्धेच्या पुरुष एकेरीत उपांत्य फेरीत धडक मारली आहे. आठवे मानांकन असलेल्या लक्ष्यने शुक्रवारी उपांत्यपूर्व फेरीच्या सामन्यात जपानच्या युशी तनाका याचा सरळ गेममध्ये २१-१६, २१-१५ असा पराभव केला. हा सामना ४० मिनिटे चालला.
लक्ष्यने पहिल्या गेममध्ये मध्यंतरापर्यंत ११-८ अशी आघाडी घेतली होती. मात्र, तनाकाने पुनरागमन करत सामना चुरशीचा करण्याचा प्रयत्न केला. परंतु, भारतीय खेळाडूने योग्य वेळी आपल्या खेळाचा वेग वाढवत २१-१६ असा पहिला गेम जिंकला. दुसऱ्या गेमच्या सुरुवातीला दोन्ही खेळाडूंमध्ये चुरशीची लढत पाहायला मिळाली. दोघांचाही गुणफलक ४-४ असा बरोबरीत होता. त्यानंतर लक्ष्यने आघाडी घेत मध्यंतरापर्यंत ११-९ अशी आघाडी कायम ठेवली. पुढेही आपली आघाडी टिकवून ठेवत भारतीय खेळाडूने २१-१५ असा दुसरा गेम जिंकत सामनाही आपल्या नावावर केला.
संपूर्ण स्पर्धेत लक्ष्य शानदार लयीत दिसून आला आहे. पहिल्या फेरीत त्याने चीनच्या ताइपेच्या ची यू जेन याचा २१-१९, २१-१८ असा पराभव करत विजयी सुरुवात केली होती. त्यानंतर दुसऱ्या फेरीत चीनच्या डोंग तियान याओ याला अवघ्या ३५ मिनिटांत २१-८, २१-१४ असे पराभूत केले होते.आता उपांत्य फेरीत लक्ष्यचा सामना इंडोनेशियाच्या एल्वी फरहान याच्याशी होणार आहे. दरम्यान, शुक्रवारी भारताचा किदांबी श्रीकांत पुरुष एकेरीच्या उपांत्यपूर्व फेरीत पराभूत होऊन स्पर्धेबाहेर झाला. जपानच्या कोकी वातानाबे याने त्याचा २२-२४, १५-२१ असा पराभव केला.
---------------
हिंदुस्थान समाचार / Suraj Chaugule
