
वॉशिंग्टन, 15 नोव्हेंबर (हिं.स.)।अमेरिकेतील हवाई वाहतूक नियंत्रण यंत्रणा (एअर ट्रॅफिक कंट्रोल) ठप्प झाल्याचा परिणाम भारतातील काही विमानांच्या उड्डाणांवरही झाला आहे. ताज्या माहितीनुसार, संपूर्ण अमेरिकेतील हवाई वाहतुकीतील व्यत्यय रविवारपर्यंत कायम राहण्याची शक्यता आहे.
अमेरिकेच्या फेडरल एव्हिएशन अॅडमिनिस्ट्रेशनचे (एफएए) प्रमुख ब्रायन बेडफोर्ड यांनी शनिवारी (स्थानिक वेळेनुसार) सांगितले की, रविवार उशिरापर्यंत विमानांची उड्डाणे नियोजित वेळापत्रकानुसार सुरू होण्याची शक्यता कमी आहे. मात्र, हवाई वाहतूक व्यवस्था पूर्ववत करण्यासाठी आणि या मोठ्या व्यत्ययाला कारणीभूत ठरलेल्या तांत्रिक समस्या दूर करण्यासाठी प्रशासनाकडून सातत्याने प्रयत्न सुरू आहेत.
विमानांच्या हालचालींवर लक्ष ठेवणाऱ्या ‘फ्लाइटअवेअर’ या संकेतस्थळानुसार, शनिवारी संध्याकाळी ६ वाजून ४५ मिनिटांपर्यंत (अमेरिकेच्या पूर्वेकडील वेळेनुसार) संपूर्ण अमेरिकेत विविध विमान कंपन्यांनी ६ हजार १५० हून अधिक उड्डाणे रद्द केली होती, तर ७ हजार ३०० हून अधिक उड्डाणांना विलंब झाला होता.शुक्रवारचा दिवस याहून अधिक खराब ठरला. या दिवशी सुमारे ९ हजार २०० उड्डाणे रद्द करण्यात आली, तर अन्य ७ हजार ५०० उड्डाणांना विलंब झाला. याशिवाय, रविवारी नियोजित असलेली ५३० हून अधिक उड्डाणेही शनिवारी संध्याकाळपर्यंत रद्द करण्यात आली होती.
शनिवारी ‘फ्लाइटअवेअर’च्या आकडेवारीनुसार, डेन्व्हर आंतरराष्ट्रीय विमानतळावरून किमान ४३० उड्डाणांना विलंब झाला, तर ३८० हून अधिक उड्डाणे पूर्णपणे रद्द करण्यात आली.दरम्यान, अमेरिकेतील परिस्थिती बिघडली तेव्हा एअर इंडियाचे दिल्ली-सॅन फ्रान्सिस्को (एसएफओ) हे विनाथांबा विमान प्रवासात होते. ते आपल्या निर्धारित ठिकाणापासून अवघ्या दोन तासांच्या अंतरावर होते. त्यावेळी हे विमान प्रशांत महासागरावरून उड्डाण करत होते.
शुक्रवारी, १३ तारखेला अमेरिकेने ‘ग्राउंड स्टॉप’चा आदेश जारी केला. या आदेशानुसार, विमानांची उड्डाणे तात्पुरती रोखून त्यांना जमिनीवरच थांबवण्यात येते. अमेरिकेची जुनी हवाई वाहतूक नियंत्रण यंत्रणा (एटीसी) तांत्रिक बिघाडामुळे काम करणे बंद करू लागल्याने हा निर्णय घेण्यात आला होता.एअर इंडियाची अन्य चार विनाथांबा विमाने अटलांटिक मार्गाने न्यूयॉर्ककडे जात होती. मात्र, ती अद्याप त्यांच्या नियोजित ठिकाणापासून बरीच दूर होती.
अमेरिकेच्या एअर ट्रॅफिक कंट्रोल सिस्टम कमांड सेंटरने (एटीसीएससीसी) १४ नोव्हेंबर रोजी पहाटे २ वाजून २४ मिनिटांनी (भारतीय प्रमाणवेळेनुसार) एक सूचना जारी केली. त्यामध्ये ‘ग्राउंड स्टॉप’ची घोषणा करण्यात आली होती. मात्र, या सूचनेत परदेशातून येणाऱ्या आंतरराष्ट्रीय विमानांना प्रत्येक परिस्थितीचा स्वतंत्रपणे आढावा घेऊन हाताळले जाईल, असे स्पष्ट करण्यात आले होते. तर अमेरिकेतून उड्डाण करणाऱ्या सर्व विमानांना जमिनीवरच थांबण्याचे निर्देश देण्यात आले होते.दरम्यान, विमानांना मार्ग बदलण्याचे निर्देश देण्यात आले नाहीत आणि त्यांना नियोजित वेळेनुसार लँडिंग करण्याची परवानगी देण्यात आली, तेव्हा परिस्थिती नियंत्रणात आली. हा व्यत्यय सुमारे पाच तास कायम होता. त्यानंतर सर्व विमाने नियोजित वेळेनुसार त्यांच्या गंतव्यस्थानी पोहोचली.
---------------
हिंदुस्थान समाचार / Priyanka Bansode