चेन्नई, २ नोव्हेंबर (हिं.स.) बंगालच्या उपसागरात 'मुरासू' चक्रीवादळ तयार झाल्याने, तामिळनाडूच्या चेन्नई आणि तिरुवल्लूर जिल्ह्यांमध्ये अतिवृष्टीसाठी ऑरेंज अलर्ट जारी करण्यात आला आहे. भारतीय हवामान विभागाने (आयएमडी) चक्रीवादळाच्या परिणामाच्या पार्श्वभूमीवर लोकांना सतर्क राहण्याचा सल्ला दिला आहे. राज्य आपत्ती व्यवस्थापन विभागाने सुरक्षेसाठी अनेक खबरदारीच्या सूचना जारी केल्या आहेत.

हवामान विभागाच्या माहितीनुसार, बंगालच्या उपसागराच्या नैऋत्य आणि लगतच्या आग्नेय भागातील तीव्र कमी दाबाच्या पट्ट्याचे चक्रीवादळात रूपांतर झाले आहे. चालू ईशान्य मोसमी पावसाळ्यातील 'मुरासू' नावाचे हे दुसरे चक्रीवादळ आहे. सध्या, चक्रीवादळाचे केंद्र चेन्नईच्या पूर्व-आग्नेय दिशेला सुमारे ५६० किलोमीटर आणि आंध्र प्रदेशातील विशाखापट्टणमच्या आग्नेय दिशेला सुमारे ६६० किलोमीटर अंतरावर आहे.

तामिळनाडू आपत्ती जोखीम निवारण संस्थेचे (TNDRRA) महसूल प्रशासन आणि आपत्ती व्यवस्थापन आयुक्त, चंद्र मोहन यांनी सांगितले की, चक्रीवादळावर सतत लक्ष ठेवले जात आहे. सध्या, ते दक्षिण आंध्र प्रदेशच्या किनारपट्टीच्या दिशेने सरकत असल्याचे वृत्त आहे. पुढील काही दिवसांत उत्तर तामिळनाडूमध्ये मुसळधार पाऊस, सोसाट्याचा वारा आणि उंच लाटा येण्याची शक्यता आहे.

प्रशासनाने लोकांना समुद्रकिनारे आणि किनारपट्टीच्या रस्त्यांपासून दूर राहण्याचे, तसेच पाणी साचलेले भाग आणि भुयारी मार्ग टाळण्याचे आवाहन केले आहे. तसेच, लोकांनी घरी पिण्याचे पाणी, अत्यावश्यक औषधे, टॉर्च, पॉवर बँक आणि चार्ज केलेले मोबाईल फोन तयार ठेवावेत असा सल्लाही दिला आहे.

विभागाने लोकांना छतावरील आणि बाल्कनीतील सैल वस्तू सुरक्षित ठेवण्याचे आणि गटारांची स्वच्छता सुनिश्चित करण्याचे निर्देशही दिले आहेत.

प्रशासनाने स्पष्ट केले आहे की, हवामानाशी संबंधित माहितीसाठी केवळ भारतीय हवामान विभाग (IMD), TNDRRA आणि जिल्हा प्रशासनाकडून मिळणाऱ्या अधिकृत माहितीवरच अवलंबून राहावे. आपत्कालीन परिस्थितीसाठी राज्य आपत्कालीन हेल्पलाइन क्रमांक १०७० आणि जिल्हा आपत्कालीन हेल्पलाइन क्रमांक १०७७ देखील जारी करण्यात आला आहे. त्याचबरोबर, लोकांनी घाबरून जाऊ नये, सतर्क राहावे आणि जारी केलेल्या सुरक्षा सूचनांचे पालन करावे, असे आवाहन करण्यात आले आहे.

---------------

हिंदुस्थान समाचार / वृषाली देशपांडे