ढाका , 02 नोव्हेंबर (हिं.स.)।बांगलादेशातील शेकडो वस्त्रोद्योग कारखान्यांचे कामकाज विस्कळीत झाले आहे. कमी वेतन आणि वाढत्या महागाईच्या विरोधात कामगारांनी सुरू केलेल्या आंदोलनामुळे देशातील औद्योगिक केंद्रांमध्ये अस्थिरतेचे वातावरण निर्माण झाले आहे.सोमवारी ढाक्यातील मीरपूर औद्योगिक परिसरात मोठ्या प्रमाणावर पोलीस बंदोबस्त तैनात करण्यात आला होता. तर सावर, अशुलिया आणि गाझीपूर या भागांमध्ये सलग तिसऱ्या दिवशी कामगारांची आंदोलने सुरू असल्याचे वृत्त आहे.

शनिवारी आंदोलनाला सुरुवात झाल्यानंतर जवळपास ५०० कारखाने तात्पुरते बंद करण्यात आले आहेत. हजारो कामगार रस्त्यावर उतरले असून, त्यांना पांगवण्यासाठी पोलिसांकडून अश्रुधुराच्या नळकांड्या आणि ध्वनीग्रेनेडचा वापर केला जात आहे. कामगारांचे आंदोलन शांत करण्यासाठी बांगलादेश सरकारने रविवारी नव्या वेतन मंडळाची स्थापना केली. हे मंडळ वस्त्रोद्योग कामगारांच्या किमान वेतनाचा आढावा घेणार आहे. दरम्यान, पंतप्रधान तारिक रहमान यांनी आपल्या मंत्र्यांसह आणि सल्लागारांसोबत तातडीची बैठक घेतली.कामगारांची किमान मासिक वेतन ३० हजार टका करण्याची मागणी आहे. सध्या त्यांना १२ हजार ५०० टका वेतन दिले जाते. त्यामुळे कामगारांची मागणी सध्याच्या वेतनाच्या दुपटीपेक्षाही अधिक आहे.

बांगलादेशचा वस्त्रोद्योग सुमारे ३८ अब्ज डॉलरचा असून, देशाच्या निर्यात उत्पन्नाचा आणि रोजगाराचा तो प्रमुख स्रोत आहे. व्हिएतनाम, कंबोडिया आणि भारतासारख्या देशांशी स्पर्धा करणारा बांगलादेशचा वस्त्रोद्योग सध्या अनेक आव्हानांचा सामना करत असतानाच ही आंदोलने सुरू झाली आहेत. कारखानदारांच्या म्हणण्यानुसार, वाढता उत्पादन खर्च, ऊर्जा बाजारपेठेतील अनिश्चितता आणि काही निर्यात क्षेत्रांमधील मागणीत झालेली घट यांसारख्या समस्यांमुळे हा उद्योग अडचणीत आला आहे.

बांगलादेश गारमेंट अँड इंडस्ट्रियल वर्कर्स फेडरेशनचे सरचिटणीस आणि वेतन मंडळावरील कामगार प्रतिनिधी बाबुल अख्तर यांनी सांगितले की, या अडचणी असूनही बांगलादेशातील वस्त्रोद्योग क्षेत्रातील कामगारांना जगातील सर्वांत कमी वेतन मिळणाऱ्या कामगारांमध्ये गणले जाते.अख्तर पुढे म्हणाले की, कारखानदारांना कामगारांना योग्य वेतन देणे शक्य नसेल, तर त्यांनी आंतरराष्ट्रीय खरेदीदारांशी अधिक चांगल्या किमतींसाठी वाटाघाटी करायला हव्यात. कमी वेतनावर काम करणाऱ्या कामगारांच्या जोरावर कारखानदारांना आपला व्यवसाय चालवता येणार नाही.

---------------

हिंदुस्थान समाचार / Priyanka Bansode