
ढाका , 20 नोव्हेंबर (हिं.स.)। लंडनस्थित मॅट्रिक्स चेंबर्स या कायदेविषयक संस्थेने नवी दिल्लीतील बांगलादेशच्या प्रभारी उच्चायुक्तांना पाठवलेल्या पत्राच्या सत्यतेवर बांगलादेशने प्रश्नचिन्ह उपस्थित केले आहे. हे पत्र माजी पंतप्रधान शेख हसीना यांच्या पासपोर्ट आणि राष्ट्रीय ओळखपत्र (एनआयडी) संदर्भात आहे. पंतप्रधान तारिक रहमान यांचे राजकीय सहकारी मोहम्मद राशेद खान यांनी नवी दिल्लीतील बांगलादेश उच्चायोगाला पाठवलेल्या पत्रातील शेख हसीना यांच्या स्वाक्षऱ्या बनावट असल्याचा आरोप केला आहे. बांगलादेशने अनेकदा शेख हसीना यांच्या प्रत्यार्पणाची मागणी केली आहे. मात्र, भारताने त्यांना बांगलादेशच्या ताब्यात देण्यास नकार दिला आहे. शेख हसीना यांनी डिसेंबरमध्ये बांगलादेशात परतण्याचा हेतू पहिल्यांदा ऑगस्टमध्ये जाहीर केला होता.
फेसबुकवरील पोस्टमध्ये राशेद यांनी दावा केला की, बांगलादेश उच्चायोगातील अधिकाऱ्यांनी या पत्राची पडताळणी केली असून, त्यात बनावट स्वाक्षऱ्या असल्याचे पुरावे आढळले आहेत. ते म्हणाले, नवी दिल्लीतील बांगलादेश उच्चायोगात कार्यरत असलेल्या एका अधिकाऱ्याशी मी सविस्तर चर्चा केली. तपासणी केल्यानंतर पत्रावरील स्वाक्षऱ्या बनावट असल्याचे समोर आले. राशेद यांनी शेख हसीना यांच्याशी संबंधित अर्जामध्ये वेगळ्या स्वाक्षरीचा वापर कसा केला जाऊ शकतो, असा सवाल उपस्थित केला. एखाद्या व्यक्तीची स्वाक्षरी ही यापूर्वी वापरलेल्या आणि अधिकृत कागदपत्रांमध्ये, विशेषतः राष्ट्रीय ओळखपत्रावर नोंदवलेल्या स्वाक्षरीप्रमाणेच असली पाहिजे, असा युक्तिवाद त्यांनी केला. पंतप्रधानपदाच्या कार्यकाळात शेख हसीना यांनी सर्व अधिकृत कागदपत्रांवर बंगाली भाषेत स्वाक्षरी केली होती. त्यामुळे अशा कोणत्याही अर्जावर वेगळी किंवा बनावट स्वाक्षरी असू नये, असा दावा त्यांनी केला.
राशेद म्हणाले, शेख हसीना एकच आहेत, त्यामुळे त्यांची स्वाक्षरीही एकच असायला हवी. राष्ट्रीय ओळखपत्रावर नोंदवलेल्या स्वाक्षरीपेक्षा वेगळी स्वाक्षरी अशा अर्जात वापरणे कायदेशीरदृष्ट्या शक्य नसल्याचेही त्यांनी म्हटले. पत्र पाठवण्यापूर्वी मॅट्रिक्स चेंबर्सच्या वकिलांनी शेख हसीना यांच्या स्वाक्षरीची भाषा तपासली का नाही, असा प्रश्नही त्यांनी उपस्थित केला. ते म्हणाले, चोर नेहमीच काही ना काही पुरावा मागे सोडतात. मॅट्रिक्स चेंबर्सनेही शेख हसीना यांच्या स्वाक्षऱ्या कथितरीत्या बनावट पद्धतीने तयार करताना अशीच चूक केली आहे. हे दस्तऐवज सादर करण्यापूर्वी वकिलांनी शेख हसीना यांना बंगाली भाषेत स्वाक्षरी केली आहे की इंग्रजीत, याची विचारणा करायला हवी होती, असेही राशेद यांनी सांगितले. हे दस्तऐवज अवामी लीगच्या नेत्यांनी त्यांच्या सत्यापित समाजमाध्यम खात्यांवरूनही प्रसारित केले होते. मात्र, या पत्राची सत्यता आणि स्वाक्षऱ्या बनावट असल्याच्या आरोपांची स्वतंत्रपणे पुष्टी होऊ शकलेली नाही.या महिन्याच्या सुरुवातीला नवी दिल्लीतील बांगलादेश उच्चायोगाला पाठवलेल्या ई-मेलमध्ये शेख हसीना यांच्या वकिलांनी उच्चायुक्तांना पासपोर्ट आणि राष्ट्रीय ओळखपत्र मिळवून देण्यासाठी आवश्यक ती पावले उचलण्याची विनंती केली होती.
लंडनस्थित कायदेविषयक संस्था मॅट्रिक्स चेंबर्सने पाठवलेल्या पत्रात, शेख हसीना यांचे बांगलादेशी नागरिकत्व आणि आंतरराष्ट्रीय मानवाधिकारविषयक दस्तऐवजांनुसार निर्माण होणाऱ्या दायित्वांचा विचार करून त्यांच्या अर्जावर तातडीने कार्यवाही करण्याची विनंती करण्यात आली होती.५ ऑगस्ट २०२४ रोजी विद्यार्थ्यांच्या नेतृत्वाखाली झालेल्या आंदोलनांमुळे शेख हसीना यांना सत्तेवरून पायउतार व्हावे लागले. त्यानंतर त्या भारतात आल्या आणि तेव्हापासून येथेच वास्तव्यास आहेत.
---------------
हिंदुस्थान समाचार / Priyanka Bansode