दुष्काळावर मात करण्यासाठी केंद्र सरकारच्या सहकार्याची दिली ग्वाही

पुणे, 03 नोव्हेंबर (हिं.स.) : महाराष्ट्रातील दुष्काळी परिस्थितीची आपल्याला पूर्ण जाणीव असून, संकटाच्या काळात राज्यातील शेतकऱ्यांना वाऱ्यावर सोडले जाणार नाही. दुष्काळातून सावरण्यासाठी महाराष्ट्राला आगामी काळात केंद्र सरकारकडून सर्वतोपरी मदत केली जाईल, अशी ठाम ग्वाही पंतप्रधान नरेंद्र मोदी यांनी मंगळवारी दिली. पुण्यातील हिंजवाडी-शिवाजीनगर मेट्रो मार्गिकच्या लोकार्पण सोहळ्यात पंतप्रधान नरेंद्र मोदी बोलत होते.

या कार्यक्रमाला राज्यपाल जिष्णू देव शर्मा, केंद्रीय मंत्री मनोहर लाल, मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार, केंद्रीय राज्यमंत्री मुरलीधर मोहोळ, मंत्री चंद्रकांत पाटील, राज्यमंत्री माधुरी मिसळ, पुण्याच्या महापौर मंजुषा नागपुरे आणि पिंपरी-चिंचवडचे महापौर रवी लांडगे यांच्यासह विविध मान्यवर उपस्थित होते. याप्रसंगी मराठीतून दिवाळीच्या शुभेच्छा देत भाषणाची सुरुवात करताना मोदी म्हणाले की, ‘महाराष्ट्रातील दुष्काळाची स्थिती मला माहिती आहे. राज्य सरकारने आगाऊ मदत दिली आहे. मी ‘पीएम किसान’चा निधी दिला आहे. शेतकऱ्यांनो, काळजी करू नका,’ अशा शब्दांत त्यांनी बळीराजाला आश्वस्त केले. मुख्यमंत्री देवेंद्र फडणवीस यांच्या नेतृत्वाखाली राज्यात जलसंधारणाची अनेक कामे झाली आहेत. मात्र, बदलते हवामान आणि पर्यावरणाचे संकट हे मोठे आव्हान असून, त्यावर मात करण्यासाठी केंद्र सरकारकडूनही सहकार्य करण्यात येईल, असे त्यांनी स्पष्ट केले.दिवाळीच्या पार्श्वभूमीवर समाजातील प्रत्येक घटकाने संकटग्रस्त शेतकरी कुटुंबांच्या परिस्थितीची जाणीव ठेवण्याचे आवाहनही पंतप्रधानांनी केले. ‘सणासुदीचा काळ आहे. आपल्या भाऊबंदांच्या अडचणी आपण समजून घ्यायला हव्यात. दिवाळी साजरी करताना दुष्काळाच्या सावटाखाली असलेल्या आपल्या बांधवांचाही विचार केला पाहिजे,’ असे मोदी म्हणाले.

शेतकऱ्यांना दिलासा; मदतीच्या अंमलबजावणीकडे लक्ष

राज्यातील दुष्काळी परिस्थितीमुळे शेती आणि शेतकरी कुटुंबांसमोर निर्माण झालेल्या आर्थिक अडचणींच्या पार्श्वभूमीवर पंतप्रधानांनी दिलेले आश्वासन महत्त्वपूर्ण मानले जात आहे. राज्य सरकारने केलेली आगाऊ मदत आणि पीएम किसान सन्मान निधीचा उल्लेख करत त्यांनी केंद्र व राज्य सरकार शेतकऱ्यांच्या पाठीशी असल्याचा संदेश दिला. आगामी काळात केंद्राकडून कोणत्या स्वरूपात आणि किती मदत उपलब्ध होणार, याबाबत शेतकरी वर्गाचे लक्ष लागले आहे.

पुण्याच्या विकासाला मेट्रोची गती

दरम्यान, मुख्यमंत्री देवेंद्र फडणवीस यांनी हिंजवडी-शिवाजीनगर मेट्रो मार्गिकेमुळे पुण्यातील वाहतूक व्यवस्थेला मोठी चालना मिळणार असल्याचे सांगितले. हिंजवडी आयटी पार्कमध्ये काम करणाऱ्या हजारो कर्मचाऱ्यांना दररोज वाहतूक कोंडीचा सामना करावा लागत होता. त्यामुळे या मेट्रो मार्गिकेची प्रतीक्षा नागरिकांना होती. पंतप्रधानांच्या हस्ते लोकार्पण होत असल्याचा आनंद असल्याचे त्यांनी नमूद केले.केंद्र सरकारच्या सहकार्याने पुण्यात अनेक महत्त्वाचे विकास प्रकल्प राबविण्यात येत आहेत. २०३० पर्यंत पुणे आणि पिंपरी-चिंचवड परिसर देशातील महत्त्वाचे वाहतूक केंद्र म्हणून विकसित होईल, असा विश्वास फडणवीस यांनी व्यक्त केला. माहिती तंत्रज्ञान, इलेक्ट्रॉनिक्स आणि वाहन उद्योगांसह विविध क्षेत्रांतील गुंतवणुकीला यामुळे चालना मिळेल, असेही ते म्हणाले.

महाराष्ट्रात 12 महानगरांत मेट्रोची कामे

देशातील सर्वांत मोठे मेट्रोचे जाळे महाराष्ट्रात विकसित होत असून, राज्यातील 12 महानगरांमध्ये मेट्रोची कामे सुरू असल्याची माहिती मुख्यमंत्र्यांनी दिली. या प्रकल्पांमुळे शहरी अर्थव्यवस्थेला गती मिळण्याबरोबरच नागरिकांचा प्रवास अधिक सुलभ होणार असल्याचे त्यांनी सांगितले.

समाजातील शेवटच्या घटकाला केंद्रस्थानी ठेवून देशात विकासाची कामे सुरू आहेत. पायाभूत सुविधांच्या उभारणीबरोबरच गरिबी निर्मूलनावरही भर दिला जात असल्याचे फडणवीस यांनी नमूद केले.

-----------------------------

हिंदुस्थान समाचार / मनीष कुलकर्णी