काठमांडू, 03 नोव्हेंबर (हिं.स.)।नेपाळमध्ये मंगळवारी सकाळी मोठी दुर्घटना घडली. सोलुखुंबू जिल्ह्यातील फेरीचे हेलिपॅडवर दोन हेलिकॉप्टरची एकमेकांना धडक बसली. लँडिंगदरम्यान झालेल्या या अपघातात एका परदेशी नागरिकाचा मृत्यू झाला असून अन्य एक व्यक्ती जखमी झाली आहे.

नेपाळ पोलिसांच्या प्राथमिक अहवालानुसार, सकाळी सुमारे ८ वाजून ११ मिनिटांनी ‘फिशटेल एअर’ आणि ‘एअर डायनेस्टी’ या दोन कंपन्यांच्या हेलिकॉप्टरची लँडिंगदरम्यान धडक झाली. माहितीनुसार, जखमी व्यक्तीला उपचारासाठी ‘प्रभू हेलिकॉप्टर’च्या मदतीने लुकला येथे हलवण्यात आले. या अपघातात मृत्यू झालेल्या व्यक्तीची ओळख अद्याप पटलेली नाही. घटनास्थळी उपस्थित अधिकाऱ्यांनी दिलेल्या माहितीनुसार, माउंट एव्हरेस्ट परिसरातील फेरीचे येथे सकाळी दोन हेलिकॉप्टरची धडक होऊन दुर्घटना घडली.

अधिकाऱ्यांनी सांगितले की, फेरीचे हेलिपॅडवर उतरत असताना ‘फिशटेल एअर’ आणि ‘एअर डायनेस्टी’च्या हेलिकॉप्टरची एकमेकांना धडक बसली. या अपघातात फिशटेल एअरच्या एका प्रवाशाचा मृत्यू झाला असून हेलिकॉप्टरचे पायलट म्हणजेच कॅप्टन जखमी झाले आहेत. या घटनेबाबत अधिक माहिती गोळा करण्याचे काम सुरू असल्याचेही अधिकाऱ्यांनी सांगितले.

फिशटेल एअरचे हेलिकॉप्टर कॅप्टन प्रज्ज्वल केसी चालवत होते, तर एअर डायनेस्टीच्या हेलिकॉप्टरची जबाबदारी कॅप्टन रवींद्र प्रजापती यांच्याकडे होती. या अपघातात कॅप्टन प्रजापती जखमी झाले असून मृत परदेशी पर्यटकाची ओळख अद्याप पटलेली नाही. दरम्यान, ‘सिम्रिक एअर’चे एक हेलिकॉप्टर घटनास्थळी दाखल झाले असून बचावकार्य सुरू आहे.

---------------

हिंदुस्थान समाचार / Priyanka Bansode