भारताचा न्यूझीलंडवर पाच गडी राखून विजय, कोहलीची अर्धशतकी खेळी
ऑकलंड, ४ नोव्हेंबर (हिं.स.) पाच सामन्यांच्या एकदिवसीय मालिकेतील पहिल्या सामन्यात भारतीय संघाने न्यूझीलंडला पाच गडी राखून पराभूत केले. ऑकलंडमधील ईडन पार्क स्टेडियमवर खेळल्या गेलेल्या या सामन्यात यजमान संघ ४०.२ षटकांत १८५ धावांवर सर्वबाद झाला. पावसाम
विराट कोहली


ऑकलंड, ४ नोव्हेंबर (हिं.स.) पाच सामन्यांच्या एकदिवसीय मालिकेतील पहिल्या सामन्यात भारतीय संघाने न्यूझीलंडला पाच गडी राखून पराभूत केले. ऑकलंडमधील ईडन पार्क स्टेडियमवर खेळल्या गेलेल्या या सामन्यात यजमान संघ ४०.२ षटकांत १८५ धावांवर सर्वबाद झाला. पावसामुळे, डकवर्थ-लुईस पद्धतीनुसार (डीएलएस) भारताला ३२ षटकांत १४३ धावांचे सुधारित लक्ष्य देण्यात आले.

भारतीय संघाने २२.४ षटकांत पाच गडी गमावून १४३ धावा करत हे लक्ष्य पूर्ण केले. या विजयासह भारताने पाच सामन्यांच्या एकदिवसीय मालिकेत १-० अशी आघाडी घेतली आहे. दोन्ही संघांमधील पुढील एकदिवसीय सामना ७ नोव्हेंबर रोजी वेलिंग्टन येथे खेळला जाईल.

भारताच्या विजयाचा शिल्पकार विराट कोहली होता. त्याने ५१ चेंडूंमध्ये १३ चौकार आणि एका षटकाराच्या मदतीने ७४ धावांची शानदार खेळी केली. गोलंदाजीत, अर्शदीप सिंगने चार बळी घेत न्यूझीलंडचे कंबरडे मोडले.

लक्ष्याचा पाठलाग करताना भारताची सुरुवात खराब झाली. सलामीवीर रोहित शर्मा शून्यावर बाद झाला. त्यानंतर कर्णधार शुभमन गिल आणि माजी कर्णधार विराट कोहली यांनी डाव सावरला आणि वेगाने धावा केल्या. मात्र, पावसामुळे सामन्यात दोनदा व्यत्यय आला. १०.५ षटकांनंतर खेळ पहिल्यांदा थांबवण्यात आला. पाऊस थांबल्यानंतर सामना ४० षटकांचा करण्यात आला आणि भारताला १६७ धावांचे सुधारित लक्ष्य देण्यात आले. मात्र, त्यानंतर लगेचच पुन्हा पाऊस सुरू झाला. जेव्हा खेळ पुन्हा सुरू झाला, तेव्हा भारताला ३२ षटकांत १४३ धावांचे लक्ष्य देण्यात आले.

त्यानंतर विराट कोहलीने आक्रमक फलंदाजी करत अवघ्या ३५ चेंडूंमध्ये आपले अर्धशतक पूर्ण केले. हे त्याचे ८० वे एकदिवसीय अर्धशतक होते. दुसऱ्या टोकाकडून शुभमन गिलने उत्कृष्ट साथ दिली. या दोघांनी दुसऱ्या विकेटसाठी ११३ धावांची महत्त्वपूर्ण भागीदारी केली. ११४ धावांवर भारताला दुसरा धक्का बसला. शुभमन गिल ५६ चेंडूंमध्ये ३७ धावा करून बाद झाला. त्यानंतर विराट कोहली ५१ चेंडूंमध्ये ७४ धावा करून बाद झाला. अक्षर पटेल शून्यावर बाद झाला. श्रेयस अय्यरने १५ धावांचे योगदान दिले. अखेरीस, नमन धीरने चौकार मारून भारताला विजय मिळवून दिला.

न्यूझीलंडकडून जेकब डफीने तीन बळी घेतले, तर काईल जेमिसन आणि नॅथन स्मिथ यांनी प्रत्येकी एक बळी घेतला.

तत्पूर्वी, नाणेफेक गमावून प्रथम फलंदाजी करण्याचा निर्णय घेतल्यानंतर, न्यूझीलंडचा संघ भारतीय गोलंदाजांसमोर मोठी धावसंख्या उभारण्यात अपयशी ठरला आणि ४०.२ षटकांत १८५ धावांवर सर्वबाद झाला. केवळ पाच फलंदाजांनी दुहेरी आकडा गाठला. टिम सेफर्टने ४३ चेंडूंमध्ये ३८ धावा केल्या. खालच्या फळीत आक्रमक फलंदाजी करणाऱ्या ब्लेअर टिकनरने एक चौकार आणि चार षटकारांच्या मदतीने २३ चेंडूंमध्ये ३४ धावा जोडल्या. ग्लेन फिलिप्सने ५१ चेंडूंमध्ये ३० धावा आणि डॅरिल मिचेलने ४१ चेंडूंमध्ये २८ धावा केल्या. जेकब डफी १५ धावांवर नाबाद राहिला. विल यंग आणि हेन्री निकोल्स यांनी प्रत्येकी नऊ धावा केल्या. टॉम लॅथमने तीन, कर्णधार मिचेल सँटनरने चार, नॅथन स्मिथने एक आणि काईल जेमिसनने एक धाव केली.

भारतीय संघाकडून, वेगवान गोलंदाज अर्शदीप सिंगने चार बळी घेतले, तर गुरनूर ब्रारने तीन आणि अंशुल कंबोजने दोन बळी घेतले.

---------------

हिंदुस्थान समाचार / वृषाली देशपांडे


 rajesh pande