बार्सिलोना, ४ नोव्हेंबर (हिं.स.) बार्सिलोनाचा तरुण फुटबॉलपटू, लॅमिन यामालने युएफा चॅम्पियन्स लीगमध्ये एक ऐतिहासिक कामगिरी केली आहे. ॲस्टन व्हिलाविरुद्ध केलेल्या गोलमुळे, यामालने फ्रेंच फुटबॉलचा दिग्गज किलियन एमबाप्पेचा विक्रम मोडत, या प्रतिष्ठित स्पर्धेच्या इतिहासातील सर्वाधिक गोल करणारा किशोरवयीन (२० वर्षांखालील) खेळाडू बनण्याचा मान मिळवला.
१९ वर्षीय यामालने कॅम्प नाऊ येथे खेळल्या गेलेल्या सामन्याच्या सातव्या मिनिटाला ॲस्टन व्हिलाविरुद्ध एक शानदार गोल केला. चॅम्पियन्स लीगमधील हा त्याचा १४ वा गोल होता. यापूर्वी हा विक्रम एमबाप्पेच्या नावावर होता, ज्याने किशोरवयीन खेळाडू म्हणून या स्पर्धेत १३ गोल केले होते. बार्सिलोनाने या सामन्यात शानदार कामगिरी करत ॲस्टन व्हिलाचा ३-० ने पराभव केला. संघाचा विजय निश्चित करण्यासाठी राफिन्हाने दुसऱ्या हाफमध्ये दोन गोल केले.
बार्सिलोनाच्या वेबसाइटनुसार, लॅमिन यामाल नवनवीन विक्रम प्रस्थापित करत आहे. मंगळवारी, ॲस्टन व्हिलाविरुद्धच्या सामन्यात, हा फॉरवर्ड खेळाडू चॅम्पियन्स लीगमध्ये २० वर्षांखालील सर्वाधिक गोल करणारा खेळाडू ठरला. त्याने आता १४ गोल करून, किलियन एम्बाप्पेचा विक्रम मोडला आहे, ज्याने आपल्या किशोरवयात १३ गोल केले होते.
लॅमिन यामालने हा पराक्रम केवळ ३७ चॅम्पियन्स लीग सामन्यांमध्ये केला आहे. विशेष म्हणजे, तो अजून २० वर्षांचाही नाही. पुढच्या वर्षी जुलैमध्ये त्याचा २० वा वाढदिवस असेल. त्यामुळे, हा विक्रम सुधारण्यासाठी त्याला अनेक संधी मिळतील.
एम्बाप्पेने आतापर्यंत चॅम्पियन्स लीगमध्ये एकूण ७२ गोल केले आहेत आणि तो स्पर्धेतील आघाडीच्या गोल करणाऱ्या खेळाडूंपैकी एक आहे. तथापि, किशोरवयीन खेळाडूंमध्ये सर्वाधिक गोल करण्याचा विक्रम आता यामालच्या नावावर आहे.
---------------
हिंदुस्थान समाचार / वृषाली देशपांडे
