परभणी, 26 फेब्रुवारी (हिं.स.)।
रेल्वे सुरक्षा दल महिला कॉस्टेबलने पुर्णा रेल्वेस्थानक येथे ऑपरेशन जीवन रक्षा अंतर्गत मंगळवारी(दि. २४)एका वृद्ध प्रवाशाचा जीव वाचवून सतर्कता आणि धाडसाचे उत्तम उदाहरण सादर केले.मंगळवारी सायंकाळी पावनेआठ वाजता महिला कॉन्स्टेबल रमा शर्मा या सकाळ शिफ्टमध्ये कर्तव्य बजावत होत्या. गाडी क्र. १७६१४ पनवेल एक्सप्रेस प्लॅटफॉर्म क्र. २ वर आल्यानंतर त्या संबंधित गाडीत “मेरी सहेली” या कार्यक्रमा अंतर्गत स्थानकावर कर्तव्यात होत्या. दरम्यान, गाडी सुटत असताना बाबुराव घाटगे (वय ७५) या वृद्ध प्रवाशांनी धावत्या गाडीत चढण्याचा प्रयत्न केला. मात्र, तोल जाऊन ते प्लॅटफॉर्म आणि धावत्या गाडीच्या मधील धोकादायक जागेत पडण्याच्या स्थितीत आले, ज्यामुळे जीवितास गंभीर धोका निर्माण झाला. ही परिस्थिती पाहताच रमा शर्मा यांनी अतुलनीय धैर्य, तत्परता व प्रसंगावधान दाखवत तात्काळ धाव घेतली आणि स्वतःच्या जीवाची पर्वा न करता त्या वृद्ध प्रवाशाला सुरक्षितरित्या बाहेर ओढून त्यांचा जीव वाचवला.ऑपरेशन “जीवन रक्षा” अंतर्गत केलेल्या या शौर्यपूर्ण कृतीमुळे मोठा अपघात टळला असून आरपीएफच्या सतर्कता, कर्तव्यनिष्ठा व मानवतावादी सेवाभावाचे उत्कृष्ट उदाहरण समोर आले आहे.प्रवाशाने व त्यांच्या कुटुंबीयांनी आरपीएफ कर्मचाऱ्यांचे मनःपूर्वक आभार व्यक्त केले. धावत्या गाडीत चढण्याचा किंवा उतरण्याचा प्रयत्न करू नये व स्वतःच्या सुरक्षिततेसाठी रेल्वे सुरक्षा नियमांचे काटेकोरपणे पालन करावे, असे आवाहन रेल्वे सुरक्षा दलाकडून करण्यात आले आहे.
---------------
हिंदुस्थान समाचार / Chaitanya JayantRao Chitnis
