रायगड, 13 मार्च (हिं.स.)। प्रीती अदाणी यांच्या नेतृत्वाखाली अदाणी फौंडेशनने महिला सक्षमीकरणासाठी राबविण्यात येणाऱ्या ‘स्वाभिमान’ या प्रमुख उपक्रमाचा मोठ्या प्रमाणावर विस्तार करण्याची घोषणा केली आहे. देशभरातील १० लाख महिला उद्योजिकांना सक्षम करण्याचे उद्दिष्ट ठेवण्यात आले असून या उपक्रमाचा पहिला टप्पा महाराष्ट्रात राबविण्यात येणार आहे.

फाउंडेशनच्या ३० व्या वर्धापन दिनानिमित्त मुंबईतील राष्ट्रीय प्रदर्शन कला केंद्र येथे ‘स्वाभिमान – द राईज ऑफ शी’ या विशेष कार्यक्रमाचे आयोजन करण्यात आले. या कार्यक्रमात महिलांच्या उपजीविका, उद्योजकता आणि आर्थिक स्वावलंबनावर या उपक्रमाचा वाढता प्रभाव अधोरेखित करण्यात आला.

विस्ताराच्या पहिल्या टप्प्यात महाराष्ट्रात एका वर्षात एक लाख महिलांना सक्षम करण्याचे उद्दिष्ट ठेवण्यात आले आहे. महिलांच्या नेतृत्वाखालील सूक्ष्म उद्योगांना चालना देणे तसेच तळागाळातील उद्योजकतेसाठी नवीन संधी निर्माण करणे हा या उपक्रमाचा मुख्य हेतू आहे. महाराष्ट्र शासनाच्या Mahila Arthik विकास महामंडळ (एमएव्हीआयएम) यांच्या भागीदारीत सार्वजनिक-खाजगी भागीदारी (PPP) मॉडेलद्वारे हा कार्यक्रम राबविण्यात येत आहे. आतापर्यंत मुंबईतील वंचित समुदायांमधील ४,५०० हून अधिक महिलांना कौशल्य प्रशिक्षण, उद्योजकता विकास तसेच आर्थिक आणि डिजिटल साक्षरतेचे प्रशिक्षण देण्यात आले आहे.

यावेळी महिला उद्योजकांसाठी ‘स्वतेजा मार्ट’ या महिला-नेतृत्वाखालील समुदाय बाजारपेठेचे उद्घाटन करण्यात आले. तसेच ‘स्वाभिमान’ उपक्रमामुळे बदल घडवून आणलेल्या महिलांच्या प्रेरणादायी प्रवासावर आधारित कॉफी टेबल बुकचेही अनावरण करण्यात आले.

सध्या अडाणी फौंडेशन देशातील २२ राज्यांमधील ७,००० हून अधिक गावांमधील सुमारे ९६ लाख लोकांपर्यंत शिक्षण, आरोग्य, शाश्वत उपजीविका आणि सामुदायिक विकासाच्या विविध कार्यक्रमांद्वारे पोहोचत आहे. ‘स्वाभिमान’ कार्यक्रमाचा राष्ट्रीय विस्तार महिलांसाठी मोठ्या प्रमाणावर आर्थिक संधी निर्माण करणार असून तो देशातील महिला सक्षमीकरणाच्या चळवळीला नवे बळ देणार असल्याचे सांगण्यात आले.

या कार्यक्रमात प्रीती अडाणी आणि शिल्पा अडाणी उपस्थित होत्या. तसेच महाराष्ट्र सरकारच्या महिला व बालविकास मंत्री अदिती तटकरे, मुंबईच्या महापौर रितू तावडे आणि एमएव्हीआयएमच्या व्यवस्थापकीय संचालक नंदिनी आवडे देखील उपस्थित होत्या. महाराष्ट्राचे मुख्यमंत्री देवेंद्र फडणवीस तातडीच्या बैठकीमुळे कार्यक्रमास उपस्थित राहू शकले नाहीत; मात्र त्यांनी संदेशाद्वारे फाउंडेशनच्या सामाजिक कार्याचे कौतुक केले.

---------------

हिंदुस्थान समाचार / संदेश साळुंके (रायगड)