वॉशिंग्टन , 15 मार्च (हिं.स.)।अमेरिकेच्या संरक्षण मंत्रालयाने (पेंटागन) विमान अपघातात मृत्यू झालेल्या सहा अमेरिकी वायुसेना कर्मचाऱ्यांची अधिकृत ओळख जाहीर केली आहे. हे सैनिक केसी-१३५ स्ट्रॅटोटँकर इंधन भरणाऱ्या विमानात प्रवास करत होते.

अमेरिकी संरक्षण मंत्रालयाने सांगितले की गुरुवारी पश्चिम इराकमध्ये झालेल्या विमान अपघातात या जवानांचा मृत्यू झाला. मृतांमध्ये एका स्क्वाड्रन ऑपरेशन्स प्रमुखांचाही समावेश आहे, ज्यांनी नुकतीच पायलट म्हणून आपली पात्रता पूर्ण केली होती. पेंटागनने शनिवारी विमान चालक दलाची ओळख जाहीर केली असून, अपघाताची चौकशी अद्याप सुरू आहे.

मृत वायुसैनिकांची नावे पुढीलप्रमाणे — ३३ वर्षीय मेजर जॉन ए. क्लिनर — ऑबर्न, अलाबामा येथील रहिवासी, ३१ वर्षीय कॅप्टन एरियाना जी. सॅविनो — कोविंग्टन, वॉशिंग्टन येथील रहिवासी, ३४ वर्षीय टेक्निकल सार्जंट अॅशले बी. प्रुइट — बार्डस्टाउन, केंटकी येथील रहिवासी, ३८ वर्षीय कॅप्टन सेथ आर. कोवल — मूरस्विल, इंडियाना येथील रहिवासी, ३० वर्षीय कॅप्टन कर्टिस जे. एंगस्ट — विलमिंग्टन, ओहायो येथील रहिवासी, २८ वर्षीय टेक्निकल सार्जंट टायलर एच. सिमन्स — कोलंबस, ओहायो येथील रहिवासी.

या चालक दलातील सदस्यांच्या मृत्यूनंतर, इराणसोबत सुरू असलेल्या तणावाच्या पार्श्वभूमीवर मृत्यू झालेल्या अमेरिकी सैनिकांची संख्या १३ वर पोहोचली आहे. अलाबामा राज्याच्या गव्हर्नर के इवे यांनी ‘एक्स’वर प्रतिक्रिया देताना म्हटले, “ते केवळ उत्कृष्ट वायुसैनिक नव्हते, तर आमचे शेजारी आणि सहकारी अलाबामावासीही होते. त्यांची आणि त्यांच्या कुटुंबीयांची सेवा कधीही विसरली जाणार नाही.”

ओहायोचे गव्हर्नर माइक डिवाइन यांनीही राज्यातील नागरिकांसह सर्व वायुसैनिकांच्या निधनाबद्दल शोक व्यक्त केला असून, ओहायो एअर नॅशनल गार्डच्या सदस्यांचाही त्यात समावेश असल्याचे त्यांनी सांगितले. अमेरिकी सैन्याने स्पष्ट केले की चालक दलाचे सदस्य केसी-१३५ स्ट्रॅटोटँकर इंधन भरणाऱ्या विमानात होते, जे गुरुवारी पश्चिम इराकमध्ये कोसळले. सैन्याने हेही सांगितले की हा अपघात “शत्रूच्या गोळीबारामुळे किंवा मित्रदेशांच्या गोळीबारामुळे झालेला नाही.”

---------------

हिंदुस्थान समाचार / Priyanka Bansode