नवी दिल्ली , 17 मार्च (हिं.स.)।भारताने पुन्हा एकदा संयुक्त राष्ट्रमध्ये पाकिस्तानला जोरदार सुनावले आणि त्याच्या खोट्या प्रचाराचा पर्दाफाश केला. संयुक्त राष्ट्रातील भारताचे स्थायी प्रतिनिधी पी. हरीश यांनी सांगितले की, भारताचा पश्चिमेकडील शेजारी देश आपली धार्मिक ओळख शस्त्र म्हणून वापरतो आणि संकुचित राजकीय उद्दिष्टांसाठी संयुक्त राष्ट्रांच्या व्यासपीठाचा गैरवापर करतो.

पर्वथनेनी हरीश म्हणाले, “भारत हा असा देश आहे जिथे जगातील जवळपास सर्व प्रमुख धर्मांचे अनुयायी शांततेत सहअस्तित्व करतात. तसेच हिंदू धर्म, बौद्ध धर्म, जैन धर्म आणि शीख धर्म या चार प्रमुख धर्मांची उत्पत्तीही भारतातच झाली आहे. त्यामुळे इतर कोणत्याही देशाच्या तुलनेत धार्मिक भेदभावमुक्त जगाची गरज भारत अधिक चांगल्या प्रकारे समजू शकतो.”

भारतीय राजदूतांनी संयुक्त राष्ट्रालाही आरसा दाखवत म्हटले, “संयुक्त राष्ट्रांची संकल्पना अशी होती की ही संस्था धर्म, संस्कृती आणि राजकारणापेक्षा वरचढ राहून काम करेल. त्यामुळे केवळ एका धर्मावर लक्ष केंद्रित करणाऱ्या आणि धार्मिक भीती (रिलिजिओफोबिया) या व्यापक समस्येकडे दुर्लक्ष करणाऱ्या कोणत्याही चौकटीबाबत सावधगिरी बाळगणे आवश्यक आहे.” त्यांनी पुढे सांगितले की, १९८१ मधील ‘धर्म किंवा श्रद्धेच्या आधारावर सर्व प्रकारच्या असहिष्णुता आणि भेदभावाच्या उच्चाटनावरील जाहीरनामा’ हा एक संतुलित दस्तऐवज आहे, जो कोणत्याही एका धर्माला विशेष महत्त्व न देता सर्व धर्मीयांच्या हक्कांचे संरक्षण सुनिश्चित करतो.त्यांनी असेही नमूद केले की, “संयुक्त राष्ट्रांनी धार्मिक ओळख शस्त्र म्हणून वापरणे आणि संकुचित राजकीय उद्दिष्टांसाठी त्याचा गैरवापर होण्याबाबत सतर्क राहिले पाहिजे आणि या वाढत्या प्रवृत्तीवर गंभीरतेने लक्ष दिले पाहिजे.”

भारताने पाकिस्तानचे नाव न घेता म्हटले, “भारताचा पश्चिमेकडील शेजारी देश इस्लामोफोबियाच्या काल्पनिक कथा रचण्यात तरबेज आहे. अशा परिस्थितीत त्या देशात अहमदिया समुदायावरील क्रूर दडपशाहीला काय म्हणायचे? किंवा असहाय अफगाण नागरिकांची मोठ्या प्रमाणावर जबरदस्तीने परत पाठवणी कशी पाहायची? किंवा पवित्र रमजान महिन्यात केलेल्या हवाई हल्ल्यांना काय नाव द्यायचे?”

भारताने ऑर्गनायझेशन ऑफ इस्लामिक कोऑपरेशन (ओआयसी) बाबतही म्हटले की, पाकिस्तान या मंचाचा स्वतःच्या फायद्यासाठी वापर करतो आणि त्याच्या मनगढंत दाव्यांच्या आधारे भारताविरुद्ध खोटे व निराधार आरोप करण्यात येतात. पी. हरीश यांनी सांगितले की, भारतात सर्व धर्मीय लोक स्वतःचे प्रतिनिधी निवडतात आणि ते प्रतिनिधी त्यांच्या आवाजाचे प्रतिनिधित्व करतात. भारताने संयुक्त राष्ट्रांना आवाहन केले की त्यांनी आपला वेळ आणि संसाधने समावेशक समाज घडवण्यासाठी वापरावीत, जिथे प्रत्येक धर्माच्या व्यक्तींच्या हक्कांचे संरक्षण सुनिश्चित केले जाईल.

---------------

हिंदुस्थान समाचार / Priyanka Bansode