नवी दिल्ली, 17 मार्च, (हिं.स.)महिलांच्या एकदिवसीय क्रमवारीत, भारतीय उपकर्णधार स्मृती मानधनाने आपले अव्वल स्थान कायम राखले आहे, तर कर्णधार हरमनप्रीत कौर सातव्या क्रमांकावर पोहोचली आहे.

ताज्या क्रमवारीत, हरमनप्रीतने एका स्थानाची झेप घेतली असताना, न्यूझीलंडची सोफी डिव्हाईन दोन स्थानांनी घसरून नवव्या क्रमांकावर आली आहे. जेमिमा रॉड्रिग्स बाराव्या क्रमांकावर आहे.

न्यूझीलंडची फलंदाज मॅडी ग्रीनने झिम्बाब्वेविरुद्ध ९४ धावांची शानदार खेळी करून लक्षणीय प्रगती केली आहे. तिच्या संघाने हा सामना २०० धावांनी जिंकला आणि मालिका ३-० ने जिंकली. ग्रीनने पाच स्थानांची झेप घेत १७ व्या क्रमांकावर झेप घेतली असून, तिचे ६१० रेटिंग गुण तिच्या कारकिर्दीतील सर्वोत्तम आहेत.

अमेलिया केरने अंतिम एकदिवसीय सामन्यात ८० धावा करून आणि पाच बळी घेऊन अष्टपैलू कामगिरी केली. तिला सामनावीर आणि मालिकावीर म्हणून गौरविण्यात आले. फलंदाजीच्या क्रमवारीत ती २१ व्या स्थानावरून संयुक्त १९ व्या स्थानावर पोहोचली आहे. इतर क्रिकेटपटूंमध्ये, गोलंदाजीच्या क्रमवारीत इसाबेल गेझ ६१ व्या स्थानावर पोहोचली, तर रोझमेरी मेयर आणि ब्री एलिंग अनुक्रमे ५८ व्या आणि ७९ व्या स्थानावर पोहोचल्या.

टी२० आंतरराष्ट्रीय क्रमवारीतही बदल झाले. दक्षिण आफ्रिकेविरुद्ध ७८ धावा करणाऱ्या अमेलिया केरला कारकिर्दीतील सर्वोत्तम ६९४ रेटिंग गुण मिळाले. जॉर्जिया प्लायमर ५० व्या स्थानावरून ४१ व्या स्थानावर पोहोचली. गोलंदाजीत, जेस केर ११ स्थानांनी वर चढून २३ व्या स्थानावर पोहोचली, तर सोफी डिव्हाईन १०४ व्या स्थानावरून ७९ व्या स्थानावर पोहोचली आहे.

---------------

हिंदुस्थान समाचार / वृषाली देशपांडे