शिमला, 20 मार्च (हिं.स.) : हिमाचल प्रदेशच्या उंच भागांत शुक्रवारी जोरदार हिमवृष्टी तर खालच्या भागांत मुसळधार पाऊस झाला. लाहौल परिसरातील बारालाचा, कुंजम, शिंकुला दर्रा तसेच घेपन पीक आणि सीबी रेंजमध्ये अंदाजे 70 ते 80 सेंटीमीटरपर्यंत बर्फ साचल्याची नोंद आहे. अटल टनल रोहतांग येथे सुमारे 90 सेंटीमीटर ताजी बर्फवृष्टी झाली आहे.

राज्याच्या धौलाधार पर्वतरांग, रोहतांग दर्रा आणि पांगी-भरमौरच्या उंच शिखरांवर हिमवृष्टी सुरूच आहे. शिमला जिल्ह्यातील कुफरी, नारकंडा तसेच किन्नौरमधील छितकुल आणि कल्पा येथेही बर्फवृष्टी झाली. राजधानी शिमला, कांगडा, मंडी, चंबा, हमीरपूर आणि ऊना येथे दिवसभर पावसाची नोंद झाली. गेल्या पाच दिवसांपासून सुरू असलेल्या पाऊस व बर्फवृष्टीमुळे संपूर्ण राज्यात कडाक्याची थंडी पसरली असून मार्च महिन्यात जानेवारीसारखी थंडी जाणवत आहे. कमाल तापमानात मोठी घट होऊन ते सुमारे 10 अंशांपर्यंत खाली आले आहे.

दरम्यान, त्रिलोकनाथ परिसरात डोंगराचा मोठा हिमखंड चिनाब नदीत कोसळल्याने नदीचा प्रवाह सुमारे एका तासासाठी अडथळित झाला. या परिस्थितीत मनाली-केलांग, आनी-कुल्लू आणि रामपूर-किन्नौर राष्ट्रीय महामार्गांसह सुमारे 100 रस्ते वाहतुकीसाठी बंद झाले आहेत. जालोरी जोत येथे 45 सेंटीमीटर बर्फवृष्टी झाल्यामुळे मार्ग बंद आहे, तर नाथपा परिसरात भूस्खलनामुळे वाहतूक खंडित झाली आहे. मनाली-केलांग मार्ग बंद झाल्याने लाहौलचा संपर्क तुटला असून तेथे वीजपुरवठाही खंडित झाला आहे. नालागढ भागात पावसामुळे गव्हाच्या पिकांचे नुकसान झाले आहे. कांगडा जिल्ह्यातील नाल्यांमध्ये पाण्याची पातळी वाढली आहे. खराब हवामानामुळे गगल विमानतळावर दिल्लीहून येणाऱ्या उड्डाणे रद्द करण्यात आली, तर भुंतर विमानतळावर सलग तिसऱ्या दिवशीही कोणतीही उड्डाणे झाली नाहीत.

हवामान विभागाच्या माहितीनुसार, शनिवार व रविवारी उंच भागांत हलक्या हिमवृष्टीसह पावसाची शक्यता आहे. राष्ट्रीय आपत्ती व्यवस्थापन प्राधिकरणाने कुल्लू, लाहौल-स्पीति, चंबा आणि किन्नौर जिल्ह्यांमध्ये 3000 मीटरपेक्षा अधिक उंचीवर हिमस्खलनाचा इशारा दिला आहे.

दरम्यान, शिमलामध्ये कमाल तापमान 8.4 अंश सेल्सियस नोंदले गेले, जे सामान्यापेक्षा सुमारे 9 अंशांनी कमी आहे. मनालीत 4.8 अंश, भुंतरमध्ये 9.5 अंश, धर्मशाळेत 12.0 अंश, कल्पामध्ये 3.5 अंश आणि केलांग येथे 0.8 अंश तापमान नोंदले गेले असून केलांग हा राज्यातील सर्वात थंड भाग ठरला आहे.

----------------------------------

हिंदुस्थान समाचार / जयेश गावंडे