नवी दिल्ली, 25 मार्च (हिं.स.)दक्षिण आफ्रिकेविरुद्धच्या टी-२० मालिकेत प्रभावी कामगिरी केल्यामुळे न्यूझीलंडच्या वेगवान गोलंदाजांनी पुरुषांच्या आयसीसी टी-२० गोलंदाजी क्रमवारीत प्रगती केली आहे. या यादीत चार किवी वेगवान गोलंदाजांनी आपल्या क्रमवारीत सुधारणा केली आहे. न्यूझीलंड आणि दक्षिण आफ्रिका यांच्यातील टी-२० मालिकेतील पहिले चार सामने अत्यंत चुरशीचे ठरले, ज्यात दोन्ही संघांच्या कामगिरीमुळे क्रमवारीत बदल झाला.

अनुभवी वेगवान गोलंदाज लॉकी फर्ग्युसनला याचा सर्वाधिक फायदा झाला. फर्ग्युसनने ऑकलंडमध्ये सामना जिंकून देणारी गोलंदाजी केली. त्याने केवळ नऊ धावांत एक विकेट घेतली, ज्यामुळे त्याला सामनावीर पुरस्कार मिळाला. या कामगिरीमुळे त्याने १२ स्थानांची झेप घेत ३९ वे स्थान पटकावले आहे. त्याचा सहकारी वेगवान गोलंदाज बेन सियर्सने २० स्थानांची झेप घेत ५९ वे स्थान मिळवले आहे. काईल जेमिसननेही पाच स्थानांची झेप घेतली आहे. तो ७६ व्या स्थानावर पोहोचला आहे. दरम्यान, जॅक्वेरी फॉल्क्स आठ स्थानांनी पुढे जात ८१ व्या स्थानावर पोहोचला आहे.

दक्षिण आफ्रिकेच्या गोलंदाजांनीही आपल्या क्रमवारीत सुधारणा केली आहे. केशव महाराज पाच स्थानांनी झेप घेत ४७ व्या स्थानावर पोहोचला आहे. त्याचा सहकारी ऑटनील बार्टमन सात स्थानांनी पुढे जात ६६ व्या स्थानावर पोहोचला आहे. जेराल्ड कोएत्झी ४६ स्थानांनी पुढे जात ८८ व्या स्थानावर पोहोचला आहे. अष्टपैलूंच्या यादीत, फलंदाजी आणि गोलंदाजी या दोन्हीमध्ये महत्त्वपूर्ण योगदान दिल्यानंतर जॉर्ज लिंडे एका स्थानाने पुढे जात २२ व्या स्थानावर पोहोचला आहे. सिकंदर रझाने टी-२० अष्टपैलूंच्या क्रमवारीत आपले अव्वल स्थान कायम राखले आहे.

भारताचा अभिषेक शर्मा टी-२० फलंदाजीच्या क्रमवारीत अव्वल स्थानी कायम असून, तो सध्या त्याचा सहकारी इशान किशनच्या पुढे आहे. पण, भारताचा टी-२० विश्वचषक विजेता कर्णधार सूर्यकुमार यादव दोन स्थानांनी पुढे जात सातव्या स्थानावर पोहोचला आहे. न्यूझीलंडचा सलामीवीर टिम रॉबिन्सन हा क्रमवारीत सुधारणा करणाऱ्या काही मोजक्या फलंदाजांपैकी एक होता. वेलिंग्टनमधील ३२ धावांच्या खेळीनंतर तो दोन स्थानांनी वर चढून ३४ व्या स्थानावर आहे.

---------------

हिंदुस्थान समाचार / वृषाली देशपांडे