रायगड, 08 मार्च (हिं.स.) । रायगड जिल्ह्यातील पेण पोलीस ठाणे हद्दीत खारपाडा परिसरात एका महिलेच्या घरात घुसून दोन अज्ञात इसमांनी जबरदस्तीने चोरी केल्याची धक्कादायक घटना घडली आहे. या घटनेमुळे परिसरात भीतीचे वातावरण निर्माण झाले आहे.
मिळालेल्या माहितीनुसार, ७ मार्च २०२६ रोजी सुमारे रात्री ९.१५ वाजण्याच्या सुमारास मौजे खारपाडा येथे मुंबई–गोवा महामार्गालगत असलेल्या फिर्यादी महिलेच्या राहत्या घरात दोन अज्ञात इसमांनी जबरदस्तीने प्रवेश केला. त्या वेळी महिला घरात एकट्याच होत्या.
आरोपींनी महिलेच्या साडीने तिचे तोंड बांधून तिला धमकावत घरातील रोख रक्कम व सोन्याचे दागिने असा एकूण १ लाख १२ हजार ४०० रुपयांचा ऐवज जबरदस्तीने लंपास केला. या घटनेनंतर परिसरात खळबळ उडाली असून नागरिकांमध्ये भीतीचे वातावरण निर्माण झाले आहे.
या प्रकरणी पेण पोलीस ठाण्यात गुन्हा रजिस्टर क्रमांक ३६/२०२६ अंतर्गत भारतीय न्याय संहिता २०२३ कलम ३०९(६), ३२९(३), १२७(२) आणि ३(५) अन्वये गुन्हा दाखल करण्यात आला आहे.
या घटनेचा पुढील तपास पोलीस उपनिरीक्षक सुनील चव्हाण करीत असून आरोपींचा शोध घेण्यासाठी पोलीस पथके रवाना करण्यात आल्याची माहिती पोलिसांकडून देण्यात आली आहे.
-----------
हिंदुस्थान समाचार / संदेश साळुंके (रायगड)
16 Apr 2026
